[Spartak0001]

Ээ-э, Спартак0001,
Кандайсың?
Амансыңбы?
Жакшыбы, жамансыңбы?
Бугун мен сени менен чер жазыша,
Сырдашкым келип турат,
Айтчы сен сырдашууну каалайсыңбы?

Мынакей, бир жыл болду шаарга келип,
"Шаардык" болгонуңа.
Бир жыл болду,
Күйүп шаардын ысыгына,
Суугуна тоңгонуңа.
Бат-баттан өтүп кеткен,
Байкалбай көчүп кеткен,
Турасың жолдо мына.
Кайрылып бир көз салчы,
Шашпастан, артта калган жолдоруңа.

Жакшысы унчукпагын,
Өзүм айтам!
Сөз айт деп сага берсем,
Сен дагы адатыңча актанасың,
Сен дагы адатыңча мактанасың,
Кейиген жериңди айтып даттанасың.


Апкаардың анча-мынча аз ооматка,
А бирок, терс жагыңды байкабадың.
Томкоруп тоону келген киши сымак,
Кай бирде кайкаладың.
Арттагы күндөрүңө,
Сарасеп салып, баалап,
Бир гана мен - жан дүйнөң
айта аламын.

Сүрү көп аким болбой,
Сыны жок акын болдуң.
Башкага жакын болбой,
Жаман-жуман,
Ырыңа башың койдуң.

Саксаңдап сайдагы бир сагызганча,
Сайраса кээ ырларың жаны тынбай.
Өзүңчө өзгөрүлүп кетесиң ээ,
Өзүңдү сезип алып Алыкулдай.

Көп ойлоп, баласы үчүн күйүп турган,
Уулум деп сүйүп турган,
Ал эссиз уулунан келечекте,
Көп нерсе үмүт кылган.
Алыста ата-энең бар.

"Бере көр тилегимди сен Эгем" деп,
"Берекем, эсен жүрсүн неберем" деп.
Беш убак намазында тилеп жүргөн
Айылда чоң энең бар.

Жол болбой аргымакка, күлүктөргө,
Зар болуп элин сатпас жигиттерге.
Дартымды билер менин эрлер болсо,
"Токтолбой чыкмакмын" деп бийиктерге,
Артыңда мекениң бар.


"Жашаймын эл-жеримди сүйүп" дедиң,
А бирок, алар үчүн күйүкпөдүң.
Айтсаңчы анан кантип актамаксың,
Ата-эне, мекениңдин үмүттөрүн?

Тагдырдан тайгалансаң капысынан,
Тааныштар турбайт дайым башты жөлөп.
Иштетиш керек экен башты демек!
Эскертип айтам сага,
Эртерээк жолуңду тап,
Эх-х, бакуш "Социолог"!...

[Mondur]

"Суперстандын таланттуулар супер-сынагы" аттуу сынак аягына чыкканына байланыштуу 1-турдагы "Сынак үчүн монолог" темасы архивге жылдырылды!