[Muslimka_Muslimka]

Башир уулу Абу Абдулла ан-Нумандын (ал экөөнө тең Алланын ыраазычылыгы болсун) айтымында: Алланын Элчисинин айтканын уктум:
«Адал (уруксат этилген иштер) белгилүү, арам (Алла тарабынан тыюу салынган) иштер да белгилүү. Бул экөөнүн аралыгында толуп жаткан шектүү(арам- адалы белгисиз) иштер бар. Муну ар ким эле биле бербейт. Ошондуктан мындай шектүү иштерден сактануучулар алар -динин жана абийрин таза сактоочулар. Ал эми андай арсар-күмөн иштерден өзүн сактай албагандар күмөндүү иштерге барып кабылат. Андайлар кудум эле корук жайдын айланасына кой жайган койчу сыяктуу: (Койлор) корукка тез эле жайылып кетүүсү мүмкүн. Акыйкатта ар бир падышанын коругу болот. О, уккула! Алла Тааланын коругу анын арам кылгандары (тыюу салуулары). О, уккула! Адам денесинде бир кесек эт бар эгер ал түзүк болсо бүт дене түзүк болот, эгер ал бузук болсо, бүт дене бузук болот, ал- жүрөк (дил).
(Бухари жана Муслимден).

[Muslimka_Muslimka]

Аби Руккаййа Тамим ибн Аус ад-Даринин (А.Ы.Б.) айтымында: Алланын Элчиси айтты:
«Дин бул-насихат (насыят)». Кимдерге ?-деп сурадык биз. Ал (Алланын Элчиси) айтты: Аллага, Анын Китебине, Анын Элчисине, мусулман жол башчыларына жана жөнөкөй мусулмандарга».
(Муслимден).

[Muslimka_Muslimka]

Умар уулунун (Аларга Алланын ыраазычылыгы болсун) айтымында: Алланын Элчиси айтты:
Мага адамдар: Бир Алладан башка кудай жок жана Мухаммад Анын Элчиси экендигине ишенип күбөлүк берип , намаз окуп жана зекет бермейинче алар менен күрөшүүгө буйрук кылынганмын. Эгер алар мунун баарын аткарышса анда алар кандарын да, малдарын да сактап калышат, бирок исламдын акы кечирилбейт, анда, алардын эсеп-кысабы бир Алланын өзүнө тапшырылат.
(Бухари жана Муслимден).

[Muslimka_Muslimka]

Аби Хурайра Абд ар -Рахман ибн Сахрдын (А.Ы.Б.) айтымында: Алланын Элчисинин айтканын уктум:
«Мен тыюу салган нерселерден качкыла да мүмкүн болушунча мен жолдоп көрсөткөн нерселерди жасагыла. Силерге чейин жашап өткөн далай элдер суроолорунун көптүгүнөн жана өздөрүнүн Пайгамбарлары менен пикир келишпөөчүлүктөрү үчүн (жаза тартып) жок болушкан.
(Бухари жана Муслимден).

[Muslimka_Muslimka]

Абу Хурейранын (А.Ы.Б.) айтымында: Алланын Элчиси айтты:
Акыйкатта Алла Таала аруу-эң сонун, (Ошондуктан Ал) таза- адалдан башканы кабыл кылбайт. Ал өзүнүн Пайгамбарларын эмнеге буйруган болсо момундарды да ошого буйруган.
Алла Таала:«О,Элчилер, таза,-адал оокаттарды жеп- ичкиле да
жакшылык иштерди кылгыла!»- деген.
Алла Таала дагы: «О, динге ишенүүчүлөр, (момундар) силерге Биз берген ырыскылардын тазасын (адалын) ичип-жегиле! »-деген.
Андан ары Ал (Пайгамбарыбыз Мухаммад алайхис салам) алыскы сапардан чарчап чаалыгып, кирдеп келип: «О, Кудай!»-деп колдорун жогору жайып турган бирөөнү эскерет да:
«Жегени арамдан, ичкени арамдан, кийгени да арамдан болуп жатса анда анын тилегин кантип кабыл кылсын?»-деди.
(Муслимден).

[Muslimka_Muslimka]

Али ибн Абу Талибдин уулу, Алланын Элчисинин небереси жана Анын жыпар жыттуу райхандай сүймөнчүгү- Абу Мухаммад ал -Хасандын (аларга Алланын ыраазычылыгы болсун) айтымында: Алланын Элчисинин айтканы эсимде:
«ШЕКТҮҮНҮ ТАШТА ДА, ШЕКСИЗИНЕ КАЧ!»
(Тирмизи жана Насаиден).

[Muslimka_Muslimka]

Абу Хурейра (разиаллоху анху) нун айтымында: Алланын элчиси айтты: “Адамдын мыкты мусулман болгондугу анын пайдасы жок нерселерди таштагандыгы”
(Тирмизи жана башкалар тарабынан)

[Muslimka_Muslimka]

Алланын Элчисинин кызматкери Абу Хамза Анас ибн Маликтин (А.Ы.Б.) айтымында: Алланын Элчиси айтты:
«Силердин) эч кимиң өзүңө ыраа көргөн (өзүңө каалаган) нерсени башка бирөөгө да ыраа көрмөйүнчө толук момун боло албайсың».

[Muslimka_Muslimka]

Ибн Масьуд (рази Аллаху анху) нун айтымынд: Алланын Элчисинин айтканын уктум:
«Мусулман кишинин канын төгүүгө болбойт, бирок (төмөнкү) үч себеп менен болот:
Зина (никесиз жыныстык катнаш, ойноштук) кылса.
Жан кыйса (күнөөсүз бирөөнү өлтүрсө).
Динден чыгып жана коомдон кетсе.
(Бухари жана Муслимден)

[Muslimka_Muslimka]

Абу Хурейра (рази Аллоху анху) нун айтымында: Алланын Элчиси айтты:
«Кудуреттүү Аллага жана Кыямат Күнүнө ишенген ар бир адам айтса чындыкты айтсын, болбосо унчукпасын, Ким Кудайга жана Кыямат Күнүнө ишенсе ал коңшусун урматтасын. Ким Кудайга жана Кыямат күнүнө ишенсе коногун сыйласын». (Бухари жана Муслимден).

[Muslimka_Muslimka]

Абу Хурейра (рази Аллоху анху) нун айтымында: Бир адам Алланын Элчисине келип: «Мага осуятыңды айтчы»-деди. (Алланын Элчиси ага):
«Ачууланба! »-деди. Тигил адам дагы бир нече жолу алиги суроосун кайталап, бир нече жолу: «Ачууланба! -деген ошол эле жоопту укту. (Бухариден)

[Muslimka_Muslimka]

Абу Йаьла Шаддад ибн Аус (рози Аллоху анху) нун айтымында:
Алланын Элчиси айткан:
"Алла Таала бардык нерсеге жакшылык кылууну парз кылды. Андыктан эгер сен өлтүрсөң да жакшылап өлтүр: эгер сен малды сойсоң да кыйнабаш үчүн силердин ар бириңердин бычагыңар жакшылап курчутулган болсун."
(Муслимден).

[Muslimka_Muslimka]

Абу Зарр Жундуб ибн Жунад жана Абу Абд ар Рахман Муаз ибн Жабалдын (ал экөөнө тең Алланын ыраазылыгы болсун) айтымында:
Алланын Элчиси айтты: «Алла Тааладан кайда болсо да, качан болсо да корккунуң. Эгер бир жаман иш кылып койсоң аны жууп кетсин үчүн артынан дароо жакшы иш кылгының жана адамдар менен жакшы мамиледе бол!» (Тирмизиден).

[Muslimka_Muslimka]

Аббас уулу Абу Аббас Абдулланын (ал экөөнө тең Алланын ыраазчылыгы болсун) айтымында: «Бир жолу мен Алланын Элчисинин арка жагында олтурдум эле, бир маалда Ал:
«Жаш жигит! Мен сага айрым сөздөрдү үйрөтөйүн: Алланы ар дайым көңүлдөн чыгарба, (ошентсең) Алла сени коргойт. Алланы эсиңен эч чыгарба ошентсең Ал сага аброй, кадыр - барк бергенин көрөсүң. Эгер сен сурасаң Алладан гана сура. Эгер сен жардам издесең Алладан изде жардамды. Билгиниң: Эгер эл чогулуп сенин мартабаңды (даражаңды) көтөргөнү жатышса алар сенин мартаба-даражаңды Алла сенин тагдырыңа жазгандай гана (көтөрө алышат), билгин: Эгер эл чогулуп сага бир залал (зыян) келтиргени жатышса да алар сага тагдырыңа Алла жазган залалды гана келтире алышат. Калем (кагаздан) ажыраган жана барактар кургаган1»- деди.
(Тирмизиден)
Ал бул хадис тууралуу: Мыкты, туура хадис- деген. Ал эми Тирмизиникинен башка да бир хадисте мындайча айтылган:
«Алла жөнүндө эсте ошондо сен Аны бет алдыңан табасың. Алланы сен жаштык күчүң бар кезинде таанып бил ошондо Ал сени кыйынчылыкта (карылык, оору-сыркоо жана башка дагы ар кандай кыйынчылыктарда) таанып билет (камкордук көрөт, коргойт, сактайт). Билгиниң жеңиш чыдамкайлык (сабыр) менен (болот), рахат кайгыдан кийин, жеңилденүү кыйынчылыктан кийин болот».

[Muslimka_Muslimka]

Абу Масуд Укба ибн Амрин ал - Ансари ал- Бадри (рази Аллоху анху)дан:
Алланын Элчиси айтты:
«Адамдарга мурунку Пайгамбарлардан калган сөздөрдүн ичинде мындай бир сөз бар: «Эгер сен уялууну (уят-сыйытты) билбесең өзүң билгенди жасай бер ».
(Бухариден).

[Muslimka_Muslimka]

Абу Амранын ал, Абу Суфийан ибн Абдулла деп да айтылат (ага Алланын ыраазылыгы болсун) айтымында:
Мен айттым: «О Алланын Элчиси! Мага Исламда (ислам тууралуу) бир сөз айтып берчи аны Сенден башкадан сурабайын» (Алланын элчиси) айтты: «Аллага ишенем деп айткының да, түз жүр!» (Муслимден).

[Muslimka_Muslimka]

Абдулла ал- Ансаринин уулу Абу Абдулла Жабирдин (ал экөөнө тең Алланын ыраазылыгы болсун) айтымында:
Бир эркек Алланын Элчисинен мындай деп сурады: «Кана мага айтып берчи, эгер мен парз кылынган намаздарды түгөл окуп, Рамазан айында орозо тутуп, адалды адал деп билип, арамды арам деп билип жана андан сактансам (ошентип) мына ушулардан артык эч нерсе кылбасам Жаннатка (Бейишке) кире аламбы?». (Алланын Элчиси ага): «Ооба»- деди. (Муслимден).

[Muslimka_Muslimka]

Абу Маалик ал- Хаарис ибн Асим ал- Ашаринин (А.Ы.Б.) айтымында:
Алланын Элчиси айтты:
«Тазалык бул - ыймандын жармысы (теңи). Алхамду лилллах (Аллага мактоолор болсун) таразаны толтурат. Субхааналлах (Алла ар кандай кемчиликтерден алыс, таза) жана Алхамду лиллах (Аллага мактоолор болсун) мына ушулар көк менен жердин ортосун толтурат. Намаз бул - Нур, садака бул- далил, сабырдуулук жаркыраган жарык, а Куран болсо сенин пайдаңа же сенин зыяныңа - далил. Ар ким ар күнү өз напсисин соодага салат, анан аны куткарып алат же аны өлтүрөт. (Муслимден).

[Muslimka_Muslimka]

Абу Зарр ал – Гиффаари (рози Аллаху анху)нун айтымында: Алланын Элчиси тарабынан берилген риваятта анын Раббы (Алла Таала) айткан экен:
«О, менин пенделерим! Зулумдукту мен өзүмө да силерге да арам кылдым, андыктан бир-бирине зулумдук кылбагыла! О, менин пенделерим! Мен түз жолго салгандан башкаларыңар баарың адашкансыңар ошондуктан менден (гана) туура жол сурангыла, ошондо мен силерди туура жолго саламын. О, пенделерим! Мен тоюндургандан башкаңар бүт баарыңар ачкасыңар, ошондуктан Менден азык сурагыла, ошондо мен силерди азыктандырам. Оо, пенделерим! Мен кийиндиргенден бөлөгүңөр баарың жылаңачсыңар, ошондуктан менден кийим сурагыла, ошондо мен силерди кийиндиремин. О, менин пенделерим, силер күндүр- түндүр күнөөгө батасыңар. Мен бардык күнөөлөрдү кечиремин, анда Менден (гана) кечирим тилегиле, Мен силерди кечиремин. О, менин пенделерим! Силерге Мага зыян келтиргидей эч кандай зыяндын түрүн кыла албайсыңар жана Мага пайда кылгыдай эч кандай пайда да келтире албайсыңар. О, менин пенделерим! Силердин алгачкыңар болсун же акыркыңар болсун, инсаныңар же жиндериңер 1 болсун силер баштан – аяк бардыгыңар араңардагы эң бир таза, эң ыймандуу бирөөнүн жүрөгүндөй тап-таза ыймандуу болсоңор да ал Менин Падышалыгымды (мүлкүмдү) эч кандай өлчөмдө көбөйтө албайт. О, Менин пенделерим!
Силердин алгачкыңар болсун же акыркыңар болсун, инсаныңар болсун же жиндериңер болсун, силердин бардыгыңар тең баштан-аяк араңардагы эң ыплас бирөөнүн жүрөгүндөй болсоңор да ал Менин Падышалыгымды (мүлкүмдү) эч кемите албайт. О, Менин пенделерим! Силердин алгачкыңар же акыркыңар болсун, инсаныңар же жиндериңер болсун бардыгыңар баштан –аяк бир жерге чогулуп алып тилек тилеп Мага кайрылсаңар, а Мен болсо ар бириңе эмне тилегиңер болсо да ошонун баарын берсем- бул, Менин колумдагыны: ийнени деңизге малгандай гана (деңизге малып кайра алганда ийнеге жуккан тамчы суудай гана) кемите алат. О, менин пенделерим! Мен силердин эмне кылганыңардын баарын көрүп –билип турамын, жана ошонуңарга жараша, ар кимиңерге өз энчиңерди беремин. Ошондуктан ким жакшылык тапса-(акыретте Бейишке кирсе) ал Алланы мактасын, ал эми ким андан башканы тапса2 ал өзүн-өзү гана күнөөлөсүн!
(Муслимден).

1 Жиндер да Кудайдын кулдары. Алар да өзүнчө уруулар, өзүнчө эл, өзүнчө падышалыктар жана аял-эркек (жуп) болуп жашашат. Алар да Кыямат күнүндө Күнөө жана сооптору Бейишке же Тозокко киргизилет.
2 Акыретте Бейишке эмес Тозокко кирсе деген мааниде.

[Muslimka_Muslimka]

Ошол эле Абу Зарр (рози Аллоху анху) нун айтымында: Алланын Элчисинин сахабаларынан (пикирлеш, санаалаш замандаш жоро- жолдошторунан бир нечеси) Алланын Элчисине: «О, Алланын Элчиси, байлар бизден көп сооп табышат экен, анткени алар (деле) биздей эле намаз окуп, биздей эле орозо тутушат да өздөрүнүн ашык оокаттарынан садака кылышат»- дешти. Алланын Элчиси айтты:
«Сооп тапчу садакаларды Алла силерге деле бербедиби: Ар – бир Тасбих1 бул –садака (сооптуу иш), ар бир Такбир2 бул – садака, ар бир Тахмид3 бул – садака, ар бир Тахлил4 бул да садака, жакшылыкка буйрумак (башкаларды үгүттөп-чакырмак) бул –садака, күнөлүү иштерден (башкаларды) кайтармак бул да – садака, ар бириңди жыныстык жакындашууң (өз аялдарыңарга) бул да – садака»-деди. Алар:
«О Алланын элчиси, эгер бизден бирөө (аялына) жыныстык кумарын кандырса ал ошондон да сооп табабы?»- дешти. Ал (Алланын Элчиси) айтты:
«Айткылачы, эгер ал арамга (арам иштерге) барса күнөөлүү болобу? Албетте,, ошол сыяктуу эле өзүнүн никелүү адал аялына барса сооп табат». (Муслимден).



1Тасбих- Субханаллах- (Кемчиликтерден таза, телегейи тегиз Алла деген мааниде).
2 Такбир-Аллаху Акбар (Алла улук, улуу).
3 Тахмид-Алхамду лиллах (Аллага мактоолор болсун).
4 Тахлил- Лаа иллаха иллаллох (Алладан башка кудай жок).