[Enesai]

Patrik. (16 Январь 2016 - 19:11) жазган:

Калеминиз курч болсун,
Жазганыныз калемпир менен мурч болсун!

Рахмат,ийгилик коштоп жүрсүн!

[Enesai]

anya (16 Январь 2016 - 19:35) жазган:

Жакшы жазылыптыр .

Рахмат,чын жүрөктөн!

[Enesai]

Монолог...

Чачырады...ой түрмөгүм төгүлдү...
Тынчтандырбай, толкун сымал,көңүлдү.
Боз туманда кечээ калгам,адашып-
Издейм бүгүн...таба албай өзүмдү...

Көп чекиттен бүткөн кезде ойлорум,
Чечкинсиздик. ..жалгыз чекит койбодум.
Катып жүрүп,коюнума калемим-
Эрким бөксө...жакшы акын болбодум...

Унуттуруп,унутулуп кала албай,
Жоготулган ишенимим таба албай,
Жалбырактай, кышка калган адашып,
Жүдөп жүрөм,жакшы ырым,жаза албай...

Боз Торгой.

[Enesai]

)))Тамашалуу ыр.

Мен сени сотко бердим!
Абийириң соттоп алсын,
Мөөнөтүң өтөп кел деп,
Эркиңен ажыратсын!

Күбөлөр мен тараптан-
Таарыныч,Ыза келет,
Далилин тактап айтып,
Көрсөтмө катуу берет!

Айыптоочу сага,
Каталык өзү болот,
Кетирген кемчилигиң-
Моюнга тактап коёт!

Күнөөңдү жеңилдетчү-
Актоочуң,макул, Сүйүүң,
Жактоочуң-Өкүнүчүң,
Эң жакшы,мени билүүң...

Абийириң соттоп алсын,
Мөөнөтүң өтөп келгин,
Мен сени сотко берем,
Күнөөңө жооп бергин!

Боз Торгой.

[Enesai]

Сагыныч...

Көйгөйү менен,күнүмдүк жашоо-турмуштун,
Коштошпой өзүм,жаштыгым качан узаттым?
Армандуу болуп,жазылбай калды ырларым,
Үндөшмөк балким,шыңгыры менен булактын...

Сыдырым желге,саамайым тоспой эркелеп,
Өмүрдүн канча кыскарттым экен,күндөрүн. ..
Шүүдүрүм төккөн,ак таңда кечип жүрбодүм,
Шиберлүү түздө,гүлдөгөн тоонун гүлдөрүн...

Көчкөнүн көрбөй,булуттун бийик тоону ашып,
Тоолорсуз жашап,тоо кызы жүрөт адашып...
Кыпкызыл көйнөк,кыпкызыл менин жоолугум,
Жайнаган гүлгө,турбады, аттиң жарашып...

Боз Торгой.

[Enesai]

Узатуу...

Ак жол тилеп,кечээ сени узаттым,
Жолуң узак,кырсык чалбай жетип ал.
Таарынычым болсо дагы,оюм ак,
Чатыш ойлор-жалгыздыкта чечип ал...

Мен сен үчүн-сагынычка айланам,
Алыстыкта менин жогум жоктолуп...
Баштагыдай өзүм сага чалбаймын-
Менде азыр,калыптанган токтоолук.

Билем бирок,дайым болом,эсиңде-
Тынчым алып,чалаарыңды кечинде.
Алыстыкта айтаар сөзүң көбөйүп-
Тынбай келчү эсэмэстер эсимде...

Турмуш жолу татаалданып турса да,
Унутпагын,тилегим ак,сен үчүн...
Тагдыр калчап,сынаса да көп ирет,
Чоочун адам боло албайсың мен үчүн...

Боз Торгой.

Билдирүүнү түзөткөн: Enesai: 18 Январь 2016 - 09:52

[Enesai]

Колдон келсе...

Өчүрбөгөн коломтодо отума,
Колдон келсе,таарынычым өрттөп сал,
Сабырымды түгөнөт деп чочусаң-
Төгүлөөрдө мелт-калт этип,сактап кал!

Үзүлбөгөн аркан эшип сүйүүдөн-
Колдон келсе,туткун кылып байлап ал.
Баштагыдай жарты сөзгө жеңилбейм-
Кайратыңды мокоп калса,кайрап ал...

Байкабастан кайсы күнү жоготтуң-
Барактарың кайра ачып окуп көр...
Ишенимим канча жолу сөгүлгөн-
Колдон келсе,кайра баштан токуп көр...

Боз Торгой.

[Enesai]

Мен билген сыр...

Эл көзүнө-жакшы ойноп келесиң,
Бактылуу жар,сен бактылуу энесиң.
Мен билген сыр-өрттөбөйбү жүрөгүң,
Айдайсың сен,кантип турмуш кемесин?

Жашырылган, ал сыр бекем катылган...
Каталыктар- сен кетирген жашыңдан...
Тагдыр оюн-жылдар менен жуулуп,
Кайра бактың,эне болуп ачылган...

Мен билген сыр-мени кээде оорутат,
А сен эне,кантип чыдап жүрөсүң?
Наристеңди кандан бүткөн унутуп,
Кантип уктап,кантип элдей күлөсүң?..

Балдарыңдан, же бир жери кем беле-
Сен таштаган,унутулган наристе?
Күнөөсү жок-күнөөлөрдөн төрөлгөн-
Канаттары сынып калган периште?..

Керек беле,бала эмес,намысың?
Эл көзүнө таза болуп калышың...
Керек беле,убалдардан курулган-
Сыныгы бар,бакытыңды табышың?..

Ички дүйнөң билбейт бирок,эч бир жан,
Сага тозок-балким күндө аткан таң...
Адамдардан койсоң дагы жашырып-
Көрүп турат,бирок баарын Жараткан!

Боз Торгой.

[Enesai]

Ак калпакчан,тоодой бийик асылдар!
"Жоо бетинде" бол дегенден алысмын.
Тебелетпей бөтөн элге намысың-
"Эл четинде" керек сенин калышың!

Жоодон эмес,"өздөн чыккан жаттардан" ,
Коргоо керек,сөздүн айтсам,ачыгын. ..
"Бычак үчүн сап" болууга бардыр дейм,
Берчүлөрүң, "катылгандын катыгын". ..

"Кой терисин жамынышкан карышкыр" ,
Бул күндөрдө арабызда көп жүрөт...
Бетин ачып,тескеп, кимдин-кимдигин,
Акыйкатты айтчулар бар-эр жүрөк!

"Күч бирдикте" ," Ырыс алды-ынтымак! "-
Бөлүнүүлөр, жарылуулар не керек?
Чын жүрөктөн калкын колдоп,коргогон-
Эл уулдары бизге дайым дем берет!

[zuxrab777]

Саламатчылык сизге Енесай эжеке.
акыркы жазган ырыңыз форумчуларга тиешелүү болсо керек, болбосо да болушу керек. үйдө баатыр, жоодо жок болгондорго арналгандай окшойт дедим, кандай болсо да сиздин жан дүйнөңүзгө тазалык мээрим, тунуктук жылуулук тилеер элем,
ким болсоңуз да бар болуңуз.

[Enesai]

Кыргыздын акса каны - денесинде,
Ишенбейм - душман келсе жеңбесине!
Жөнөкөй,карапайым жигиттер көп -
Кут конгон,улуу кыргыз - жергесинде!

Төш кагып,мансап үчүн жулкунбаган,
Жагынып,бийлик көксөп - умтулбаган,
Жоо тосуп,жан кыюуга даярлар бар -
Душманга чек арасын буздурбаган!

"Менмин" деп,көп ичинен суурулбаган,
Урааны тынч заманда угулбаган -
Манас бар,Чубагы бар калк ичинде,
Эл коргоп,жоону беттеп - утурлаган!

Эр жигит эл четинде - жоо бетинде!

Боз Торгой.

[Enesai]

zuxrab777 (23 Февраль 2016 - 11:34) жазган:

Саламатчылык сизге Енесай эжеке.
акыркы жазган ырыңыз форумчуларга тиешелүү болсо керек, болбосо да болушу керек. үйдө баатыр, жоодо жок болгондорго арналгандай окшойт дедим, кандай болсо да сиздин жан дүйнөңүзгө тазалык мээрим, тунуктук жылуулук тилеер элем,
ким болсоңуз да бар болуңуз.

Рахмат жакшы тилегиңе ыраазычылык, ийгилик каалайм!