[kanat4ik]

Балыкчы шаарында катуу шамалдан
мектептердин шиферлери учуп, айнектери
сынган. Бул тууралуу ӨКМнын басма сөз
кызматы билдирди. Маалыматка ылайык, 4-
февралда саат 21:30дан 5-февраль саат 05:00гө
чейин шаардын аймагында ылдамдыгы секундасына 24-28 метрге жеткен катуу шамал
катталган. Такталган маалыматтар боюнча шамалдын
кесепетинен Манас атындагы №10 орто
мектептен 12 даана шифер 12 м² айнек,
Каралаев атындагы №6 лицей мектебинен 15
даана шифер жана Ленин атындагы №4 гимназия
мектебинен 15 даана шифер, 6 м² айнек сынган. Жалпы 42 даана шифер жана 18м² айнек сынган.
Ал эми жалпы материалдык чыгым 19 290 сомду
түздү.

[kanat4ik]

2013-жылдын жыйынтыгы менен жарандардын
көпчүлүгү укук коргоо кызматкерлеринин жана
соттордун ишине нааразы болушуп, алардын
үстүнөн көп арыз түшүптүр. Бул тууралуу
ЖКнын бүгүнкү, 6-февралдагы жыйынында
депутат Тынчтык Шайназаров билдирди. Айтымында, Өкмөт ушул маселени көтөрүп
анализ жасашы керек. “Эмнеге жарандар укук коргоо органдарына каршы арыз жазып жатышат? Конституцияга
ылайык, жарандарды коргоо негизги башгыт
болушу керек. Жылына жүздөгөн адамдар
мыйзамсыз түрдө жоопко тартылат. Кыймыл
аракетинде кылмыштык иш жок экени
аныкталса да тергөөчүлөр жоопкерчилик албайт. Экинчиден иш сотко жөнөтүлгөн соң
сот тарабынан ал адамдар күнөсүз деп
табылууда. Бирок айыпталып жаткан адамдын
абалы кандай болгонун эч ким назарына албайт.
Элдин бийликке нааразычылыгы соттор менен
укук коргоо органдарынын мыйзамсыз аракеттернен улам келип чыгууда”,- деди эл өкүлү.

[kanat4ik]

2014-жылдын 4-февралында, Кыргыз
Республикасынын Президенти Алмазбек
Атамбаев «2013-жылдын 17-сентябрында
Брюссель шаарында кол коюлган Кыргыз
Республикасы менен Европалык инвестициялык
банктын ортосундагы Кыргыз Республикасындагы Европалык инвестициялык
банктын ишин жөнгө салуучу алкактык
макулдашууну ратификациялоо жөнүндө»
Кыргыз Республикасынын Мыйзамына кол койду.
Маалыматты президенттин басма-сѳз
кызматынан билдиришти. Мыйзам Кыргыз Республикасынын Жогорку
Кеңеши тарабынан 2014-жылдын 16-
январында кабыл алынган. Мыйзамга ылайык, Кыргыз Республикасынын
Тышкы иштер министрлигине Европалык
инвестициялык банкка Кыргыз Республикасынын
жогоруда көрсөтүлгөн Макулдашуунун күчүнө
кириши үчүн зарыл болгон ички мамлекеттик
жол-жоболорду аткаргандыгы жөнүндө кабарлоо милдети тапшырылды. Мыйзам расмий жарыяланган күндөн тартып 10
күн өткөндөн кийин күчүнө кирет.

[kanat4ik]

КСДП партиясынын лидерлеринин бири,
парламенттеги социалдык саясат
комитетинин башчысы Дамира Ниязалиеваны
аталган комиттеттин башчылыгынын кетирүү боюнча депутаттар арасында кол топтоо
башталды. Эң кызыгы, бул аракетти "атажуртчу" же
"республикачы" эмес, болгондо да депутат
айымдын өзүнүн фракциялаштары Эркингүл
Иманкожоева, Абдыманап Кутушев жана
Текебаев төпөштөгөн Мурадил Мадеминов
"үчилтиги" уюштуруп, буту-бутуна тийбей тымызын чуркап жүрүшөт экен. Билишибизче,
бул үчилтик аталган демилгени буга чейин
өздөрүнүн фракциясынын жыйынына алып
чыккан, бирок, андан майнап чыгара алышпай,
эми жалпы парламенттин депутаттарын аралай
чуркап жүрүшөт. Айрым депутаттар “үчөөнүн жеке таарынычтары же кызыкчылыктары бар
болсо, жалпы парламенттин ишине
аралаштырып, резонанс кылбай эле ич ара чечип
алышса болмок” деген пикирде. Мындай болсо, чын эле буларда партиялык
принцип, позиция деген кайда? Булар ич ара
минтип тытышып жатса, бул комитеттен
“таарынып” чыгып кеткен "атамекенчи" аксакал
депутат Ташполот Балтабаев карап тим
турмакпы, "азаматтар, 30дан ашык депутаттын колун топтоп коюшуптур" деп алакан ушалап,
табасы канып турган кези дейт. Ал эми бул
оюнду билгендер болсо, “мунун башында дал
ушул “аксакалдан” турат”- деп айтышууда.
Чындык үчүн айтып коюу эп, кантсе да Дамира
Ниязалиева КСДПнын кадырлуу мүчөлөрүнүн бири, партиянын далай ачуу-таттуусун башынан
өткөргөн, кандуу апрель окуясында ок
жегендердин артынан күйүп-бышып чуркап
жүргөн, саясатта өз орду бар айым эмес беле?..
Же калппы?

[kanat4ik]

Саясий оюндарда туруктуулугун кѳрсѳтүп,
катылгандын катыгын берип келе жаткан
Алтынбек Сулайманов жанына жер-жерлерде
такшалган курч жигиттерди топтоп, саясий
күрѳштү чечкиндүү түрдѳ жүргүзгѳнгѳ ниеттенип
жатканын эшиттик, -деп жазат “Учур” гезити 6- февралда чыккан жаңы санында

[kanat4ik]

Бакиев идея менен келген жана ал иштеп
турганда анча-мынча кемчиликтерди эске
албаганда ѳндүрүш алдыга жылып баштаган,
бюджет 70 миллиард сомго чыккан, 270 мектеп
курулган, жолдор оңдолгон. Бир жылда
салыктан, бажыдан түшкѳн акча менен элди иштетпей бага турган мүмкүнчүлүк бар! А учурда
тескерисинче карызга белчебизден батып бүттүк.
Убактылуу ѳкмѳт келгенден бери бюджет 23
миллиард сомдон ашык дефицит болду. Азыркы
бийликтин кетишине ѳтѳ ынтызармын. Отунбаева
менен Атамбаевди мен президент катары эсептебейм, -дейт Талант Анарбаев.

[kanat4ik]

Төрт күндөн бери кар күрткүсүнөн улам унаа
жолу жабылып, сырткы байланышы жок калган
Оргазган айылына куткаруучулар жана дарыгер
жөнөтүлөт. Мындай билдирүүнү Өзгөчө
кырдаалдар министринин орун басары Нурдин
Абдылдаев бүгүн Өзгөн районунун Ийри-Суу айыл округуна барган жерде билдирди. Маалыматка ылайык, Ош облусунун Өзгөн
районунун Ийри-Суу айыл аймагында 2014-
жылдын 1-февралы күнү саат 13:00 чамасында
Ийри-Суу-Оргазган ички чарбалык унаа жолунун
7-12-чакырымдарында (жолдун жалпы узундугу
20 чакырым) бороон болгондугуна байланыштуу, кар күрткүсү пайда болгон. Оргазган айылына баруучу жолду кар
күрткүсүнөн тазалоо иштерине КРнын ӨКМнен 1
бульдозер тартылып, жолдун 6 чакырым
аралыгы (кар күрткүсүндө калаган аралыгы 10
чакырым) тазаланды. Аталган айылга Кыргыз Республикасынын
Өзгөчө кырдаалдар министринин орун басары
Нурдин Абдылдаев баштаган министрликтин
ыкчам тобу барды. Абалды жеринен көрүү үчүн
барган министрдин орун басары Нурдин
Абдылдаев төрт күндөн бери жол байланышы жок калган Оргазган айылынын кандай абалда
жашап жаткандыгын айыл округ башчысынан
кошуна айылдын калкынан сурап билди. Ийри-Суу айыл округунун башчысы Азамат
Дүйшеевдин айтымында, 1-февралдан бери бул
унаа жолу аркылуу каттоо мүмкүн болбой жатат.
Аталган айылда 35 кожолукта жалпысынан 157
адам жашайт. “Кечээ атчандарды жөнөтүп араң
байланышканбыз, эң негизгиси эл тынч экен. Оргазган айылында жыл сайын ушундай
көйгөйлөр болуп турат. Айылдын эли азык-
түлүктөрүн күзүндө камдап алышат”- дейт
Азамат Дүйшеев.

[kanat4ik]

Жогорку Кеңеш Төрагасынын орун басары
Төрөбай Зулпукаров башында турган Кыргыз
Республикасынын Жогорку Кеңешинин
депутаттары Нурбек Алимбеков, Акылбек
Эшимов, Малик Осмонов бүгүн, 5-февралда
Башкент платформасынын президенти, Кайсери шаарындагы КРнын ардактуу консулу Мустафа
Курт башында турган түрк делегациясы менен
жолугушту. Тараптар Кыргызстандын инвестициялык
жагымдуулугун жогорулатуу, ишкердик
чөйрөсүндөгү укуктук жөнгө салууну өркүндөтүү
маселелерин талкуулашты. Жолугушуунун жүрүшүндө вице-спикер
Т.Зулпукаров Кыргызстан Кыргыз
Республикасынын эгемендигин биринчилерден
болуп тааныган Түркия менен кызматташуусун
өнүктүрүүгө кызыкдар экенин баса белгиледи.
“Бизди орток маданиятыбыз, тилибиз, тарыхыбыз бириктирип турат, андыктан,
биздин өлкөлөр ортосундагы достук
мамилелерди өнүктүрүүбүз керек”, -дейт Т.Зулпукаров. М.Курт өз кезегинде түрк ишкерлери өлкөнүн
инвестициялык жагымдуулугун жогору
баалаарын жана дос өлкө катары Кыргызстандын
экономикасын өнүктүрүүгө өз салымдарын
кошууга даярдыгын маалымдады. Буга
байланыштуу ал инвесторлор үчүн эң алды менен өлкөдөгү туруктуулук, мамлекеттик
органдар менен өнөктөштүк чоң мааниге ээ
болоорун айтты. Жогорку Кеңештин депутаттары өлкөнүн
инвестициялык жагымдуулугун жакшыртууга
багытталган мыйзам базасын өркүндөтүү менен
катар мыйзамдардын аткарылышына көзөмөл
кылуу зарылдыгын жана бул багытта алдыда
дагы көп иштерди аткаруу тургандыгын белгилешти. М.Курт башында турган түрк делегациясынын
курамында парламент депутаты Рамазан Топрак,
Анкара шаарынын Соода-өндүрүш палатасынын
төрагасы Атиллахан Курт, палата мүчөлөрү
Уурхан Курт, Садык Уйсал, Ахмет Фахри
Шенйиит жана BABIL Groupтун өкүлү Саибжан Салижанов бар.

[kanat4ik]

1 жыл бою “Кумтөр” маселеси чечилбегендиктен
Кыргызстан 80 миллион доллардан кол жууган.
Бул тууралуу кечээ, 5-февралда ЖКнын
жыйынында премьер-министр Жантөрө
Сатыбалдиев депутат Эсенгул Исаковдун
суроосуна жооп берип жатып билдирди. “Бул сумманы азыркы акчанын курсу боюнча
которсок 4 миллард сом болмок”,- деди Сатыбалдиев. Өз кезегинде төрага Асылбек
Жээнбеков чечиле элек маселеден Кыргызстан
кантип акча жоготорун айтып, таң калды. Өкмөт башчы эгер аталган келишим кабыл
алынса ушул сумма өлкөгө 1 жыл ичинде
түшмөк экенин айтты. “Экономика министрлиги билдиргендей, бул жылкы капиталдык
салымдарга 2 миллиард сом гана бөлүнгөн. Эгер
бул акча түшсө канча деген ооруканалар ,
мектептер курулуп, жолдор оңдолмок”,- деди Сатыбалдиев

[kanat4ik]

Кыргызстан эгемендүүлүкко ээ болгон 1991-
жылдан бери жайкы жана кышкы болуп жалпы
10дон ашык Дүйнөлүк деңгеелдеги
Олимпиадалык оюндар өткөрүлгөн. Ошолордун
ичинен А.Акаев ажолук кылган 15 жылдык
доордо кыргызстандык спортчулар 1 коло медалга жетишкен. Ал- Айдын Смагулов. 2000-
жылы Сиднейдеги Олимпиадада дзюдо боюнча
60 кг салмакта коло медаль алган. К.Бакиев президенттик кылган 5 жыл ичинде
өлкөбүз 1 күмүш жана 1 коло медалга ээ болгон.
Бээжиндеги 2008-жылы болгон Олимпиада
Канатбек Бегалиев күрөш боюнча 66 кг салмакта
күмүш медаль. Руслан Түмөнбаев 60 кг
салмакта күрөш боюнча коло медаль. Ал эми Убактылуу Окмөттүн башына
Р.Отунбаева менен А.Атамбаев келгенине 2
айдан кийин 4 жыл болот . 4 жыл ичинде
Кыргызстан Олимпиада оюндарына катышып
медаль алып келмек түгүл, Сочи-2014
Олимпиадасына 1 гана спортсмен даярдап жөнөттү. “ Биздин спортчуларга 2008-жылкы Бээжин
Олимпиадасында өлкө президенти Курманбек
Бакиев колдоо көрсөтүп, спортчулар
президенттин Ала-Арчадагы жана Ысык-Көлдөгү
резиденцияларында машыгууларды өткөрүшкөн.
Ал эми Пекинге жөнөөр алдында да президент спортчулар менен жолугушуп, олимпиададан
алтын медаль тагынып кайткан спортчуга
Бишкектен мыкты квартира берилерин, кийинки
орундарды багынткан спортчулар жеңил
автоунаанын ээси болушарын айткан болчу”-деп
жазылган Олимпиаданын тарыхтары аттуу эмгекте. Ошентип Пекин Олимпиада оюндарынан
байгелүү келген Канат Бегалиев жана Руслан
Түмөнбаев жаңы Жип автоунаалуу болушкан. Олимпиадалык хартия - бул олимпиадалык
оюндардын эрежеси 1894-жылы кабыл алынган.
"Олимпиада оюндары төрт жылда бир жолу
өткөрүлөт. Жайкы жана кышкы Олимпиада
оюндары болуп турат. Кыргызстан
Олимпиадалык оюндарга 1992-жылы КМШ өлкөлөрүнүн атынан гана катышкан болсо, 1996-
жылдан бери эгемендүү мамлекет катары
Кыргызстандын деген ат менен катышып келатат. Кышкы Олимпиада оюндары 1994-жылы
Лиллехаммерде (Норвегия), 1998-жылы Наганодо
(Жапония), 2002-жылы Солт-Лейк-Ситиде(АКШ),
2006-жылы Туринде (Италия), 2010-жылы
Ванкуверде (Канада) болгон. Ал эми жайкы
Олимпиада оюндары 1996-жылы Атлантада (АКШ), 2000-жылы Сиднейде (Австралия), 2004-
жылы Афинада (Греция), 2008-жылы Пекинде
(Кытай), 2012-жылы Лондондо (Улуу Британия)
уюштурулган.

[kanat4ik]

Эки күндөн бери өкмөт парламентте “Кумтөр”
маселесин өткөзө албай өтө кыйналды. Себеби,
алардын жаңы келишимин КСДПдан башка төрт
фракция жактырбай, көпчүлүгү колунан келсе,
азыр эле өкмөттү жаткыза чаап салгысы
келгенин биз да парламенттен жакшы байкап турдук. Андайга жеткизбейли деген өкмөт
мүчөлөрү парламент ичинде төрт фракциянын
көрүнгөн депутаттарынын “аке-жакелешип”
көчүгүнөн ээрчип жүрүштү. Алар болсо ансайын
каадаланып, катуу кыйнап, ар кайсы шарттарды
айтып турушту окшойт. Ал эми колдойбуз деген КСДПнын депутаттарын бир да министр, бир да
агенттиктин жетекчилери карап да коюшкан жок.
Буга КСДПчылары өздөрү да нааразы болуп,
“күйбөгөн жери күл болуп” турганын байкадык.
Себеби, чоң сүйлөшүүдөн, балким чоң акчадан
кур калып жатканын “жыт алгыч” мурундар алдыртадан сезип турса керек да. “Жыт алгыч”
мурундар демекчи, мындай добуш берүү менен
чечиле турган чоң маселелер каралып жатканда
парламенттин босогосун алты айда же бир
жылда бир аттаган айрым эл тааныбаган
депутаттардын пайда болуп, бакылдап сүйлөп калышы да көпчүлүктүн көңүлүн өзүнө бурду.
Мисалы, Болот Шер, Мамат Орозбаев, Роман
Шин, качып кетти делген Исхак Пирматовдор эки
күн бою парламенттен эшикке чыкпай, ошонун
ичинде “жашагандай” эле болушту окшойт. Мына
ушул маселелердин баарынын ачыгы келип олтуруп, баягы эле сасык саясатка, арам акчага
такалып жатпайбы...

[kanat4ik]

Парламенттин кечээки жыйынында жакшы кеп
болду. Ошондо депутат Эркин Алымбеков: “Мага
премьер-министрлик кереги жок, мен вице-
премьер-министрлик орунга макулмун. Ошол
кызматка келсем, мен бир жылдын ичинде
“Кумтөрдөн” алчу үлүштү 67%ке жеткизем. Ошондо Жантөрө Сатыбалдиевдин өкмөтү
кызматтан кетип, алардын иши коррупция боюнча
сотко өтүшү керек. Эгерде мен үлүштү 67%га
жеткизе албасам, анда үй-мүлкүмдү
конфискациялап туруп камагыла. Болбосо,
Жантөрө Сатыбалдиевди камагыла” – деп бир топ эле катуу айтты. Ал мурунку күнү болсо:
“Түшүнбөй жатасыңарбы? Өкмөт эмне кылсаңар
да 67ге жеткизе албайт. Мага десе, виагра
берсеңер да, 67ге жеткизе албайт” – деп
коомчулуктун күлкүсүн келтирген. Кыязы, Эркин
мырза, виагранын сырын жакшы билет окшобойбу. Ошондуктан, өкмөткө бекеринен
сунуштап жатпаса керек. Кудай сактаса болгону
деп биз турабыз...

[kanat4ik]

“Кумтөрдүн” чуусу чубалган сайын кызык кептин
баары айтылат экен. Башбакан болуп бакыйып,
парламентте башын шылкыйтып отурган Жантөрө
Сатыбалдиев “Канадалык компанияга
экологиялык, экономикалык талаптарыбыз бар.
Өкмөттүн дагы, менин дагы башым ордунда. Талаптар боюнча бардык суроолор чечилмейин
“Кумтөр” боюнча реструктуризацияга барбайбыз”
– деди. Камак дегенди уккан сайын кабагы
карыш түйүлүп жаткан Жантөрө мырзага
мамдирекция боюнча дагы өтө көп суроолор бар.
Ош менен Жалал-Абад шаарларын калыбына келтирип жатканда 6 сомдук кирпичтерди 18
сомдон сатып алып, далай акчаны дайынын
таптырбай кеткени боюнча эле кепти козгосок,
калганы өзүнөн-өзү калкып чыгат.

[kanat4ik]

Кайран жеңен Каныкейдин: “Атаңдын көрү
дүнүйө! Кароолчусу атаңдын... Ажыбай болбой
мен болсом... Чийбейт белем сызыкты... Кан
Коңурбай каапырды... Бээжинге чейин кубалап...
Салбайт белем кызыкты” дегени бар. Анын
сыңарындай депутат Эркинбек Алымбеков эки күндөн бери эле оолугуп “мен вице-премьер
министр болсом, Канадалыктар менен кандай
сүйлөшүштү көрсөтөт элем” – деп жаткан. Кечээки Кумтөрдү караган парламенттин
жыйынында премьер-министр Ж.Сатыбалдиев
дал ошол тилинен кармалды. “Эгерде эле биздин
үлүшүбүздү айтып жаткан 67 пайызга чыгарып
жиберсе, мен Эркинбек Алымбековдун сунушуна
даярмын. Ал үчүн каражатты деле табалы, калганын деле кылалы. “Ата-Мекен” ак батасын
берсе эле келип иштей берсин” – деди.
Эмнегедир күүлөнүп аткан Э.Алымбеков талкан
сугунуп алгансып, үндөнгөн жок.

[kanat4ik]

Ысык-Көлдөгү өкмөттүн ыйгарым укуктуу өкүлү
Каптагаевди саруулуктар укпаса, жергиликтүү
элге кадыры жок болсо, анда бу жетекчини неге
кармап отурушат? Каптагаев Саруу айылындагы
кыйналган элдин талабын түшүнбөсө, алар
менен тил табыша албаса, облустун жолу тосулуп, мамлекеттин ичинде өзүнчө мамлекет
жаралууда. Дал ушундай башаламандыкка
Э.Саламатович күнөлүү. Себеби, "Кумтөргө”
нааразы болгон саруулуктардын талабын
Каптагаев башында түшүнүү менен кабыл алып,
сүйлөшүү жолу менен жаралган көйгөйдү жайгарса болмок да, туурабы? Минткендин
ордуна ал “саруулуктар эл эмес” дегенге чейин
барганын кайда жашырабыз? Мына, күн өткөн
сайын Ысык-Көлдө абал кооптуу жагдайды
жаратып, мамлекеттүүлүккө доо кетирүүдө.
Эртелеп облус жетекчисин алмаштырбасак болбойт. Эртең кеч болуп калат. Бийлик элдин
шоруна калып бүтмөй болду го.

[kanat4ik]

Кыргызстандын баардык аймактарында байма-
бай жарыктын өчүрүлүп жатканы элдин кыжырын
кайнатууда. Кыш келгени эле айылдарда, жаңы
конуштарда, атургай Бишкектин кичи
райондорунда светтин үзгүлтүккө учурашы болуп
келсе, соңку убакта жылуулукка болгон кризис ого бетер күчөдү. Бакиев режими тушунда баш
калаанын кичи райондорунда жарык өчүрүлчү
эмес. Бу бийликтегилериң эски режимден да
ашып түштү. Энергетика министри Осмонбек
Артыкбаев сүйлөсө оозу менен орок оруп,
лапшыңдаган чечендиги бар. А иш жүзүндө мукурап, элди жарык менен камсыздабай,
кыргыз элин суукка тоңдуруп, оорукчан кылып
бүттү. Эгер Осмонбектин эркек экени чын болсо,
креслого жабышпай кетпейби?Же булар намысты
да ичип-жеп салышканбы?

[kanat4ik]

“Ата Мекен” парламенттик фракциясынын лидери Өмүрбек Текебаев
кечээ, 7-февралда Чүй облусунун Сокулук районунун активи – айыл
өкмөттөрүнүн башчылары, жергиликтүү кеңештердин төрагалары жана
райондогу мамлекеттик кызматтардын өкүлдөрү менен жолугушту. Бул
тууралуу Жогорку Кеңештин басма-сѳз кызматынан кабарлашты. Сокулуктуктар элдин турмушунда ыкчам чечүүнү талап кылган
маселелерди депутаттын алдына коюшту. Маселен, жер тилкелерин
трансформациялоо боюнча мыйзам кабыл алынганы менен ал
аткарылбай жаткандыгы, дачаларга атайын макам берилбегендиктен, ал
жакта жашаган эл каттоосу жок көп кыйынчылыктарга кабылып
жаткандыгы айтылды. Мындан сырткары, мектептер кандайдыр бир өндүрүш ишканасы болбосо
дагы электр кубаты үчүн 1,5 сомдон төлөгөндуктөн, мындай тариф айыл
өкмөттөрүнүн бюджетине оордук жаратып жатканы дагы башкы көйгөй
катары белгиленди. Айыл чарбасына берилүүчү жеңилдетилген
насыяларды жер иштеткен дыйкандар албай эле, башка багытта
колдонулуп жатканына дагы айрым тургундар нааразычылыгын билдиришти. Көтөрүлгөн көйгөйлөрдү шайлоочулардын наказы катары кабылдаган
депутат Ө.Текебаев алардын айрымдарынын чечилишин Өкмөттөн талап
кылаарын айтып, айрым суроолорду жеринде канаатандырды. Насыя алгандардын тизмеси банктык купуя сыр экенин белгилеген
парламентчи аны алууга укуктууларды аныктоо менен бирге “Банк
ишмердүүлүгү жөнүндө” мыйзамга түзөтүү киргизебиз дейт. Муну менен
катар лизинг системасы менен бериле турган техникаларды айыл
өкмөттөрү дагы алгандай кылып тиешелүү мыйзамга өзгөртүү
сунуштаарын билдирди. Ө.Текебаевдин айтымында, айыл өкмөттөрүндө айрым техникалардын
жоктугунан аларды ижарага алып, элдин көйгөйүн чечүү алда канча
чыгымга алып келип жатат деген кайрылуулар бар. “Андыктан, элдин көйгөйлөрүн чечүү максатында айыл өкмөттөрүнө лизинг менен
техника алууга мүмкүнчүлүк берилиши керек”,- дейт ал

[kanat4ik]

Борбордук шайлоо комиссиясы "Ата Мекен"
фракциясынын депутаты, Жогорку Кеңештеги
Адам укуктары, конституциялык мыйзамдуулук
жана мамлекеттик түзүлүш комитетинин
төрагасы Эркинбек Алымбековду мандатынан
ажыратты. Бул кабарды Жогорку Кеңештин вице- спикери Асия Сасыкбаева “Азаттыкка”
тастыктады.
Сасыкбаеванын билдиришинче, Борбордук
шайлоо комиссиясы мындай чечимди жумуш
убактысы бүткөн кезде кабыл алган. Депутат
муну азыркы бийликке чындыкты айткан адамдар жакпасы, чөнтөк парламент керектиги менен
түшүндүрдү. Сасыкбаева муну менен катар
Алымбеков депутаттыктан кетүү арызын фракция
менен акылдашпай жазганын билдирди.
Бүгүн Жогорку Кеңештеги "Ата-Мекен"
фракциясынын жетекчи орун басары Эркинбек Алымбеков Борбордук шайлоо комиссиясына
кайрылуу жолдогон. БШКдан "Азаттыкка"
кабарлашкандай, анда Алымбеков "депутат
болбойм" деген чечим кабыл алганын жазган.
Кечээ парламентте Кумтөр маселеси
талкууланып жатканда депутат Алымбеков эгер өкмөттү колдогон чечим кабыл алынса
мандатынан баш тартаарын айтып чыккан болчу.

[Argymak007]

Сочи Олимпиадасынын ачылышынан кийин бүгүн мында келген бардык өлкө башчыларын кабыл алып болгон соң Путин Назарбаев, Атамбаев үчөө калып өздөрүнчө сүйлөшүп олтурушат.


Аксакал катары алгач сөз алган Нурсултан Назарбаев айтат:

- Менин 50 дөй спортчум келди, мында болгон спорттун баардык түрүнө катышат- десе, Владимир Путин:

- Менин спортчуларым ар бир спорттун 1 түрүнө 5тен адам катышат- деп мактаныша берет.

Экөөнүн сөздөрүн угуп олтурган Кыргызстандын президенти Алмазбек Атамбаев акыры-ыын "Мен бир эле спортчу алып келдим, ошол эле баарына жетишет. Көбүрөөк алып келсем, силерге алтын калбай калабы дедим" деп экөөбүн мат кылыптыр 

[kanat4ik]

Ысык-Көл облусу боюнча өткөн жылы өкмөттүн
ыйгарым укуктуу өкүлү жаратылышты коргоо
боюнча үч айлык жарыялаган. Бул боюнча
облустун жети инспекциясы иш алып барышууда.
Иш-чаранын алкагында пландуу иштер жана
ыкчам иликтөөлөр уюштурулууда. Бул тууралуу жаратылышты коргоо боюнча Түп, Ак-Суу, Жети-
Өгүз райондорунун жана Каракол шаары боюнча
мамлекеттик башкы инспектор Жаныбек
Дүйшембиев билдирди.