[rnurzida]

Адамдар


Билбейм! Билбейм, эмнеге андайсыңар,
Бир нерсени эч эске албайсыңар:
Ансыз деле бүгүн бар, эртең жокпуз,
Билип туруп бир-бириң каргайсыңар!

Өйдө-ылдый деп, бир-бириң иргейсиңер,
Кем дүйнөнүн кеңдигин билбейсиңер!
Ажалга да бип-бирдей пенделербиз,
Түркүк болчу дүйнөгө ким дейсиңер!

Көңүл гүлүн эмнеге соолутабыз,
Көкүрөктү көйгөйгө оорутабыз.
Жандүйнөнү жанчтырып жаман-жуман,
жарыбаган ойлорго тоорутабыз!

Көрө албастык, жек көрүү, араздашуу,
Кыянаттык, кызганыч, каракташуу,
Таарынычты талкалап таштайлыбы,
Кошуп туруп аларга аракты ачуу?!

Макулсуңбу, кана анда күлүп койчу,
Маңдайыңда булутту сүрүп койчу.
Ошол миңдин бири дейт дарылыкка,
Өзүңдөн да башканы сүйүп койчу?..

Билбейм! Билбейм, эмнеге андайсыңар,
Бир нерсени эч эске албайсыңар:
Ансыз деле бүгүн бар, эртең жокпуз,
Билип туруп бир-бириң каргайсыңар!

[rnurzida]

Кимсиң дебе...


Түнтсүң дебе, миң электүү сырым бар,
Сузсуң дебе, адамдык парс, сыйым бар.
Сараң дебе, тоого, сууга – баарына,
Окуп берээр эки сабак ырым бар.

Жашсың дебе, карып барат ойлорум,
Массың дебе, аны да ичпей койгомун.
Кимди көрсөң, эмне көрсөң кыялкеч,
Ошолордун баарын мен деп ойлогун.

Жакшы дебе, айырмам жок эч кимден,
Бала дебе, балалыгым эскирген,
Акын дебе, боло элекмин чыныгы,
Жөн гана бир тоолук кыз де, кеп билген.

Кимсиң дебе, кээде өзүм да билбеймин,
Чечилбеген түйүн менен бирдеймин.
Жакшы ыр жазып койгон кезде жадырап,
Анткен менен... кээде өзүмдөн сүрдөймүн.

[rnurzida]

Эстутумдан.. . жалгыз сенден башканын,
Баарын-баарын келди өчүрүп таштагым!
Эмнегедир сени дагы унуттум
десем кайра…кусалана баштадым...

[rnurzida]

Сен менден издегениң таппаганың
Сездим мен... Ишеничиң актабадым.
Кадалып карап туруп каректериң,
Кайрылып кетти, издеп башкаларын. ..

[rnurzida]

Мынча эмнеге?..

Көңүлдүн көксөөсү бар көздөрүңдө,
Керемет сыр жашынат сөздөрүңдө.
Күндөргө күтүү менен күүгүм кирип,
Түндө да түштөр кирет биз жөнүндө.

Ырдасам сагынычым жетет бекен,
Ынагым, ырга айлангым келет нечен!
Ылайым ыр түнөгөн жүрөгүңдө,
Ыр болуп жашагым бар керек десең!

Канатты күүлөйм сага жетким келет,
Кайгыдан арачалап кетким келет.
Төгүлгөн кирпигиңден кагылайын,
Тагдырлар табышабы, эх ким билет!

Сеңселген саамайыңды желбиретип,
Элесиң тиктейт жанды элжиретип.
Билбеймин, мынча эмнеге сүйдүрөсүң,
Шипширин добушуңду дилдиретип.

[rnurzida]

Апам жана мен

Жигитке жар, балдарыма энемин,
Кыялкеч кыз, боз уланга жеңемин.
Анткен менен апакемдин алдында,
Саамай көкүл, секелеги элемин.

Кумарлана жытын искеп баланын,
Кырк кырында кыялданып барамын!
Анткен менен апакемдин алдында,
Баёо сезим, балапан ооз баламын!

Үйбүлөнүн, жардын болуп жөлөгү,
Артык экен өз балаңдын өнөрү.
Анткен менен апакемдин алдында,
Баягы эле бакыраң көз бөжөгү!

Бек кучактап, бекем кысып бооруна,
Сагынганбы, айланчыктай тоорула,
Баягыдай аркасына көтөрүп,
Кеткиси бар дале койсоң оюна!

Айтаарга сөз, ашын таппай берерге,
Бала – бакыт, бала кымбат энеге!
Өзүң ата, апа болуп турсаң да,
“Ымыркайым, кичинем!” – дейт дагы эле!

[rnurzida]

Көрүнбөс жолдор менен зуулдаган,
Азгырып, убактымды уурдаган…
“Алло... да? ...Бу ким экен?" - деген өңдүү,
Телефон чакырыктар… чуулдаган.


А бирок арасында чыгынбаган,
Мен күткөн коңгуроо бар жымылдаган. ..
Зымы жок, номуру жок, кабары жок,
Эч качан чалынбаган, угулбаган...

[rnurzida]

КЭЭДЕ МЕН

Кээ бир кезде – өткөн, кеткенди эстеген,
Күндөрдү аяп көп мүдөөгө жетпеген,
Өзөк өрткө, өкүнүчкө чулганып,
Учурлар көп – аттиң дүйнө, эх деген!

Ээн калып, жайдакталган кезде мен,
Элестер бар – эңсөө менен эстеген.
Эңшерилип, бири кем бул дүйнөдө,
Эрксиз анан тунгуюкка кептелем.

Ооба, баары, тирүүлүк да чек менен,
Ошон үчүн барга тобо деп келем.
Оомал, төкмөл дүйнөнү эмес, жаңылган
күндөр үчүн кээде өзүмдү жек көрөм.

Келише албай жүрөк акыл-эс менен,
Кээ бир кезде мен сүйүүдөн четтегем.
Келбечүдөй кеткен сезим, эми өч
алыш үчүн келеби деп сестенем...

Өмүрдүн бир күнү батса кеч менен,
Караңгы түн, жымжырттыкка кез келем.
Алда нени элестеткен бу түндөн,
Кээде чыкпай калуучудай шектенем.

Андай кезде өзүмдү-өзүм текшерем:
“Жерде калып, качандыр бир (эх) денем,
Эстен чыгар өңү-түсүм... а бирок,
Эл ичинде ырым менен эстелем...

Анда өмүрдү сүрбөптүрмүн текке жөн...” -
деп өзүмдү алдап, бирок эске мен
бир чындыкты алгым келбей кайпактайм:
“Кечпи-эртеби, чын суракта тескелем...”

[rnurzida]

Бир кечте

Бүт аялзат
сени гана карашып,
Эмнегедир бүгүн баары сага ашык!
Арасында мен да бармын алардын,
Башым туман – акылымдан адашып!

Ыр. Музыка.
Сен ортодо бийлейсиң,
Назар төшөп, төгүлгөнүм билбейсиң.
Сен мага азыр аргымагын алкынтып,
Айдан түшүп келген асыл пирдейсиң!

Көздөр! Сөздөр!
Бокалдардын кагышы,
Мага жакшы – арабыздын алысы!
Сүрөтүңдү тарттым дагы карадым,
Кандай сырдуу, кандай сүрдүү жан ушу?!

Башкача бир
башты чулгуй карап шер,
Кээде-кээде чагылышат каректер!
Ушундай бир улуу кечти көтөрүп,
Өз нугунда тегеренип барат Жер!

[Baktyluumun]

Men suygon akyn ejekego... Chygarmachylygyn syilaym!!! Yrlary jagat! Maaniluu!

[rnurzida]

Жашоого ким бар экен түркүк болгон,
Өмүр аз - бир кыпындай бүркүп койгон.
Суранам, жакшы сөзүңдү аябачы,
Дарыдай - жүрөгүмө сүртүп койгон...

[rnurzida]

Күтүү... үмүт...


Бүдөмүк... келесиңби, келбейсиңби,
Кабарың бересиңби, берейсинби.
Таң эрте, түштө, кечте жолуң карап,
Болду эми, карабайм, - дейм, - тереземди.

Ансайын жаным кейип, жанчылууда,
Дарамет калбай барат талпынууга,
Сагыныч жүрөгүмдөн баш көтөрүп,
Далбастап сени карай тартылууда.

Күтүүдө үмүт мынча берешенби,
Ченемин чексиздикке теңесемби.
Күтпөймүн, издебеймин. .. деген болуп,
Уурданып карай берем терезеңди...

[rnurzida]

Унут дейсиң

Унут дейсиң! Унутууга акым жок!
Сендей мага бул ааламда асыл жок!
Сенсиз жашоо жалаң арман! А бирок:
Антпе! – дейсиң, - Ачуу душман, акыл дос!

Өчтү, - дейсиң, өчтү сендик махабат!
Жүрөгүмдө бүттү, сүйүү жашабайт! -
дедиң дагы, кеттиң жаным кош айтып,
Өткөн-кеткен күндөр үчүн жазалап!

Бирок мейлиң. Ичээр суусу түгөнсө,
Сүйүү эмес – адам өзү азаят.
Өкүнүч көп! Өзөгүм не өрттөнөт?!
Өксүк мени өмүр бою өрттөмөк!

Кадырына жетпей калып сүйүүнүн,
Экөөбүздүн жолдор эми бөп-бөлөк!
Бирок мейли. Көрөр күнү түгөнсө,
Сүйүү эмес – өмүр деле бөксөрөт!

Кош бол эми, кош бол менин бийигим,
Мен дагы эми сага көптүн биримин...

[rnurzida]

А балким...

Билбеймин,
мен сенден эмне таптым?
Оңой менен жибибес жүрөгүмө
сагынычтын,
кусалыктын отун жактың...

Балким бул... оорудур,
диагнозу табылбаган?
Акылдуу,
жакшы адамдар кабылбаган?

Балким бул -
Сыноосудур тагдырдын,
Кантээр деп
ара жолдо жолуктурган?
Эритип жүрөктөгү сезимди бир
Качанкы,
Музга айланып тоңуп турган?
А балким, бакытпы же,
Кеч күздө учуп келип,
башыма конуп турган?

[rnurzida]

Туман

Каяктан келдим,
Кай жакка бара жаткамын?
Каякта жолум,
Деги өзүм кайсыл жактамын?

Кайдасың, айтчы,
Добушуңду угам, өзүң жок,
Адашып турам,
айланам туман капкалың…

Сагындым сени,
Күн-түнүм сени саматат,
Жанчылып денем,
Жандүйнөм солуп баратат.

Оорутпай мени,
Таарынчың болсо жазып кой,
Адамга сендей
Айкөлдүк гана жарашат.

[rnurzida]

Мени сүйгөн бир адам

Мени сүйгөн, таза сүйгөн бир адам,
Чын сүйүүгө арзыганга кубанам.
Сүйүү деген аруу сезим бар үчүн,
Көрсө кызык, сулуу экен бу аалам.

Мени сүйгөн, таза сүйгөн ал адам,
Көңүлүмдү аздектеген, аяган...
А мен анын... ушунчалык суктанып,
Сүйүү толгон көздөрүнө карагам...

[rnurzida]

Кимсиң?

Жүрөк сезип – качандыр бир табарым,
Өмүр бою күткөн асыл адамым...

Сенсиңби ошол?.. Жылуу учурайт көздөрүң,
Качан, кайдан уккансыймын сөздөрүң?..

Ай менен Күн тогошкондой туюлган,
Ушул күндү балким тагдыр буюрган?

Же болбосо болуп жүрбө азгырык,
Көзүмдү алдап, арзуу болуп кубулган?

Билбейм. Кимсиң... Балким дагы башкасың?
Тиктебе анда, сезимге от жакпа, чын!

“Сапар кезип бара жаткан кайдадыр,
Бөтөнмүн,” – деп айт ачыгың, жалгагыр!

Ким болсоң да кечир, капыс кабылып,
Тааный албай турам көзүм карыгып!

Анткеним жөн – күтүү жанга батса да,
Жүрөгүмдүн падышасын башкага,

Алмашкандан – адашкандан коркомун.
Башка болсоң – белгиңди бер, аз гана...

Суранамын, кадаба антип көзүңдү,
Укпайынчы! Унчукпа, айтпа сөзүңдү!

Токтолбогун! Кеткин! Өтүп кете бер,
Бу жолдордон кайчы өтүшкөн нечелер...

Карегиңе сүрөтүмдү тартпагын,
Мен да сага азабымды артпайын! ..

Туура айтасың, ушул тентек көздөрүм
менен далай жүрөктөрдү өрттөдүм,

Бирок өзүм канча өрттөнгүм келсе да,
Жүрөгүмдүн жылыганын сезбедим!..

[rnurzida]

Сен мени

Сен мени сагынтайын дедиң бекен,
Телефон чалбай дагы, келбей коюп.
Чын эле сенсиз мага күндөрүмдүн,
Татыбай тузу такыр кемдей болуп...

Сен мени таарынтайын дедиңби же,
Атайлап алыстатып кабарынды,
А бирок билбейсиң ээ, кандай азап,
Жоготуу жандай көргөн адамыңды.

Сен мени унутайын десең керек,
Арга жок, ага деле түтөм демек.
Жолуңду карай-карай, үшкүрүккө
үшүтүп үмүмтүмдү үзөм демек...

[rnurzida]

Кайрылчы

Аячы мени?
Аячы жаным кичине?
Оорукчан болдум,
Ойлорум батпай ичиме.
Жараткан деле
кечирим кылат турбайбы,
Адашып калып,
айыбын сезген кишиге.

Кечирчи мени?
таарынтам деген эмесмин,
Кайрылчы бери,
анчалык узай элексиң?
Санаадан соолуп,
саргайып бүтүп баратам,
Сен гана мага
мурөк суу сымал керексиң.

Же балким сен да
кызгандың бекен мага окшоп,
Тунжурап тиктеп
калчу элең үнсүз, бала окшоп.
А бирок , билбейм,
сезбедиң экен эмнеге,
Эч качан, эч ким
сүйдүрбөйт мени сага окшоп...