Кайдыгерлик же көңүл буруунун жетишсиздиги
Акыркы күндөрү адаттагыдай эртең менен кутман таң каалап жазбай калды. Жолугушууларды мурдагыдай болжошпой, же жолугууга келем деп, келбей койду. Себебин тушүндүрүүдөн баш тартты же ойду- тоону сүйлөп жалган себептерди айтканы билинип калды. Телефон чалсаңыз, мурдагыдай көңүлдөнүп сүйлөшпөйт, же кайра озүм чалам деп, бирок, чалбайт. Өзүңүз чалып, эмне үчүн байланышууга чыкпаганын сурасаңыз унутуп калганын айтат. Демек, бул адам менен сиздин бирге болууңузга күмөн жаралат.
Сизге караганда достору маанилүүрөөк
Бош убактысынын дээрлик бардыгын достору менен өткөрөт. Ошондой эле бул учурда сизге достору менен жүргөндүгүн билдирип коюуну маанилүү деп эсептебейт. Дем алыш күндөрү мурдагыдай сейилдеп келүүгө же, киного, паркка барууга чакырбай калды. Андыктан аны көлөкөдөй ээрчигенди токтотуңуз.
Зыкым
Мурункудай кафе же ашканага барып чогуу тамактанбай калдыңыздар. Майрамдарда көңүлүңүздү көтөрүп гүл десте да бербей калды. Демек, ал сизди жашоосундагы маанилүү адам катары көрбөйт, андыктан ашыкча каражат короткусу келбейт.
Сүйлөшөөргө сөз табылбай калды
Сүйлөшүүлөр кыска суроо- жооп менен коштолот. Жөн гана чоочун адамдардан деле сурай турган көнүмүш ал- ахывал сурашуу менен чектелет. Экөөңүздөрдү кызыктырган башка тема такыр табылбайт. Ортодогу узак жымжырттыктан улам бири- бириңиздерден тажай баштайсыздар. Ыңгайсыздык жаралат.
Көңүлкоштук
Маанайыңыз чөгүп же сыркоолоп турганыңызды байкаса деле ага маани бербейт. Же болбосо жакшынакай көйнөк кийип келсеңиз аны мактап, жакшы пикир айтып коюуга да жарабайт. Бардык тарабынан көңүлкоштугун көрсөтөт. Мындай адамдан ддагы эмнени үмүт кылууга болот?!... Ойлонуп көрүңүз.
Башка айымдарга көңүл бура баштайт
Ооба, кээ бир мырзалар өтө эле адепсиздигин көрсөтөт. Сиз менен бара жатса же сейил бакта отурса ары- бери өткөн кыздарга суктана карап, алар тууралуу өз оюн айткандан уялбайт. Сизге бул оор тийээрин эске албайт. Мындай мырзадан түбөлүктүү жар күтүүгө негиз барбы?! Сергек акыл менен ойлонуп, аны өз жайына коюңуз.
Мындан сырткары...
Себепсиз кызганычтар. ..
Кээ бир мырзалар сүйгөндүгүнөн эмес, ишеничтин жоктугунан бир күндө 100 жолу телефон чалып ,кайда жүргөндүгүңүздү сурай берет. Ар дайым шектенүү менен карайт. Мындайлар адатта үйлөнгөндөн кийин сөзсүз кол көтөрөт. Сүйөт, ошон үчүн кызганат-, деген бекер кеп. Кызгануунун орду башкача болот.
Мамилеси олуттуу эмес
Сүйлөшүп жүргөнүңүздөргө көп убакыт болсо деле жоро- жолдоштору, туугандары же ата- энеси менен тааныштырууга шашылбайт. Сиздин дагы жакындарыңыз менен таанышууну каалабайт. Экөөңүздөргө тиешелүү келечек тууралуу такыр кеп козгобойт, эптеп эле убакыт өткөрүүнүн айласында жүрөт. Мындай мамиленин сизге кереги барбы?!
Сезимдери байкалбайт
Эгерде анын сизге болгон сезими бар болсо, анда аны сиз сөзсүз түрдө байкайсыз. Сөздөрүнөн, көздөрүнөн, жасаган мамилесинен байкасаңыз болот. Ал эми сезими жок болсо, ал тараптан бир гана муздактык келет....
Ал тууралуу эч нерсе билбейсиз... .
Анын жашоосундагы маанилүү кабарлардан дайыма артта каласыз, же таптакыр эле укпайсыз. Кандайдыр бир ийгиликке жетишкенин, окуяга кабылганын, ооруп калганын, же бир жакка барып келгенин башкалардан угасыз. Кээде кокусунан өзүнөн бир топ убакыт өткөн соң угасыз. Себеби, айдан ачык көрүнүп турат эмеспи....
Жыйынтыктап айтканда, келечетк үй бүлө курууга ниеттенип мамиле курган мырзаңыздан жогорудагы белгилердин бири эле байкалса, кеч боло электе байланышты үзүңүз. Анткени мындай шартта ал бир күнү сөзсүз жүрөгүңүздү жаралап кош айтып кетет. Бул учурда катуу кыйналып калышыңыз ыктымал. Андыктан ар дайым өзүңүзгө кам көрүп, жүрөгүңүздү оорутууга эч кимге жол бербеңиз.
U
Цитата
Мобилдүү версия