[Rayyana]

***
Сен сүйлөп жаттың мага,
Унчукпай турдум угуп.
Сөздөрүң супсак мынча,
Болсо да оюң тунук.

Сезимди эзип бир ой,
Көңүлүм башка жакта.
Кечирчи, кечирип кой,
Сүйө албайм кайра баштан.

("Күн түнөгөн жүрөк").

[Rayyana]

***
Көздөрүң ач мышыктын көздөрүндөй,
Сезимиң жылыгыстай калган катып.
Калыпсың ошол бойдон өзгөрүлбөй,
Келдиң не душманымдай жыла басып.

Сүйөм деп айткансың деп кекээрлебе,
Ал сүйүү билсең эбак калган өчүп.
Экөөбүз эки башка жан экенбиз,
Эстебе, үйлөп салгын көңүл отун.

("Күн түнөгөн жүрөк")

[Rayyana]

***
Кыш өкүмүн жүргүзөр күндөр келип,
Күмүш күздүн күүлөрү аяктады.
Сумсайышат сыр бербей бой керишип,
Бишкегимдин сымбаттуу дарактары.

Шамал ойнойт сапырып жалбыракты,
Көчөлөрдө элдер аз агылышкан.
Аяр басып абайлап өтөм жалгыз,
Көлчүктөрдөн ай сымал чагылышкан.

Ушул кечте ардагым, сени ойлодум,
Көкүрөккө батпаган эргүү толуп.
Балким, мени ойлодуң сүйүү менен,
Балким, чыктым эсиңден эбак толук…

Көп жыл болду, тосомун күздү жалгыз,
Алтын түстүү көркүнө кумар канбай.
Мен сагынып өзүңдү жүргөнүмдө,
Биле албадым сен болдуң ойдо кандай.

Күн кыскарып, айлана кыш жыттанып,
Күмүш күздүн күүлөрү аяктады.
Сумсайышат мага окшоп сагынычтан,
Бишкегимдин көркөмдүү дарактары…

Балким, мени ойлойсуң сүйүү менен,
Балким, эбак эсиңден чыктым толук…

[Rayyana]

***
Айрандай көөшүйт кышкы түн,
Апакай тартып ак кардан.
Сезимдин жагып билигин,
Сен келдиң алыс жактардан.

Жолугуу кыска, сөздөр көп,
Кымбатым сага айтарга.
Басылбай көөдөн өрттөнгөн,
Жаш тамаар жаным кайтарда.

Ыраазы болгун а бирок,
Өчүрбөй сүйүү үмүтүн.
Бир өмүр калар дилиңде,
Жомоктой болгон кышкы түн.

Турсаң да жаның ачышып,
Сураба ракым тагдырдан.
Келээрсиң дагы кайрылып,
Жазылган болсоң тагдырга.

Жылдыздай жанган карегиң,
Алсамбы сурап тагдырдан?

[Rayyana]

Махабат тумары

Cөздөр өлгөн көкүрөктө, көөдөндө,
Аралыктар махабатты муздатып.
Селт этемин жазган катың көргөндө,
Түркүн ойлор жүрөгүмдү сыздатып.

Деңиз болсоң толкундарың шарпылдап,
Кучагына албай калды ынагым.
Көр тирилик көйгөйүндө салкындап,
Жоготтукпу махабаттын тумарын?

Сөздөр өлгөн көкүрөктө, көөдөндө,
Селт этемин жазган катың көргөндө...