"Жөжөнү күздө санайбыз" деп коёт эмеспизби, мына, саначу маал, "Супер сулуу-2011" сынагынын жеңүүчүсүн аныктоочу маал келди. "Супер сулуу" сынагы быйыл бешинчи ирет ай чырайлуу, кымча бел сулуулар арасында өткөрүлүүдө. Жалпысынан сынакка кыргызымдын 36 кара көз сулуулары катышып, алардын 14ү иргелип финалга чыгышты. Сынактын дагы бир шарты, купальник менен сүрөткө түшүү болчу.
Маралдай керилген бийкечтер 12-13-декабрда Спорт Ордосунда өтүүчү концертте өз өнөрлөрүн көрсөтүүгө катуу чамданып, даярдык көрүп жаткан чактары. Кыздардын келбетине сиз да баа берип, "Супер сулуу-2011" наамынын жеңүүчүсүн бирге тандайлы!
Айтмакчы, бул ирет "Супер сулууга" "Келдике" зер борборунун мыкты дизайнерлери атайын таажы жасашууда.

Сынактын баш байгесин алган бактылуу бийкеч кычыраган кыш мезгилинде жыпжылуу экзотикалык өлкөлөрдүн бирине эс алууга жолдомо алмакчы. Элестетиңиз, Кыргызстанда кычыраган кыш, ал эми жеңүүчү кыз ысык өлкөгө барып көк ирим сууга түшүп, күнгө кактанып, чет элдин маданияты, эли менен таанышып, саякаттап келет... Ал эми калган кыздар да концерттен куру кол кетпей, өзүнө татыктуу наам алат деп ишендиребиз.
Сынакка тактыгынан тайбаган атактуу инсандар калыс болмокчу. Жарым жылдан бери ат салышып келе жаткан кыздарды мурун гезит бетинен гана көрө алсаңыздар, эми алар сиздерге өз өнөрлөрүн тартуулашмакчы. Жомоктогудай атмосфера, суйкайган кыздар... Мунун баары бир гана 12-13-декабрь күндөрү Спорт Ордосунда болмокчу. Андыктан, достор, “Супер концерт-2011ди” өткөрүп жибербеңиздер. Ысык болот!

"СУПЕР СУЛУУ-2011" СЫНАГЫНЫН ФИНАЛЧЫЛАРЫ ТӨМӨНКҮ
СУРООЛОРГО ЖООП БЕРИШТИ:
– Эки жигитти жактырып калдың дейли. Бири келишимдүү, экинчиси бай. Кайсынысын тандамаксың?
– Келбетиңден кайсы жериңди “фишкам” деп эсептейсиң?
– Улуу жазуучу Чыңгыз Айтматов качан, кайда төрөлгөн?