Бул окуя Голливуд тасмаларындагы курч эпизоддорду артка таштачудай. Сиздин, биздин эле замандаштар, болгондо да жапжаш, 20-22 жаштагы жигиттер каракчылыкка айыпталып кармалышты. Куралданган алар так эле тасмадагыдай “жерден өсүп чыга калышып”, а дегенге алын келтирбей ири суммадагы акчасын алып кетишкен. Андан да кызыгы, кармалган жигиттердин бири белгисиз себептер менен азыр боштондукка чыгып кетиптир.

ЖҮРҮП БАРАТКАН МАШИНАНЫ АСЫЛЫП ТОКТОТУШКАН
28-февралда кечке жуук борбор шаарыбыздын 5-кичирайонунда жайгашкан күркөдөн фирманын экспедитору Сергек Абдыкеримов товарын өткөрүп, акчаны алып чыгып келе жатканда кол салууга дуушар болгон. Иликтөөнүн версиясы боюнча, тапанча, таяк менен куралданган бет капчан үч адам Сергек автоунаасына отурар замат чуркап келишип, моюнуна илип алган сумкасын тартып алууга аракет жасашат. Сергек каршылык көрсөтүп, машинаны айдап, каракчылардан качып кетүүгө аракет кылат. Бирок автоунаа жүрүп баратса да эшигине ач кенедей жабышкан тоноочулар аны тапанча такап коркутушат.
Ошол маалда жардам берип жүргөн Сергектин аялы кыйкырып жиберип, каракчылар жакын жерде күтүп турган күмүш түстүү БМВ автоунаасына отуруп качып жөнөшөт (ким билет, аялы көрүп калбаганда дагы бир адам өмүрүнөн айрылат беле). Жөн кетпей сумкадагы ири суммадагы (73 миң сом) акчаны алып кеткенге үлгүрүшкөн. Сергек болгон окуя тууралуу ошол замат фирманын жетекчилигине, жетекчилик өз кезегинде милицияга билдирет.
“Уурунун арты кууш” дегендей, ошол убакта Октябрь РИИБинин оперкызматкерлери өз автоунаасында баратып жол чыракка токтоп калышат. Алдында турган БМВнын номери чүпүрөк менен жарым-жартылай жабылып калганы из кубарларга шектүү көрүнөт. Шектүү көрүнгөн автоунааны жөн гана текшерип коюуну чечишет. Мындан аркысы кинодогудай уланат: автоунаанын ичинде тапанча, таяктар менен куралданган бет капчан адамдар... Капканга так белинен чабылган жигиттер каршылык көрсөтүп, качып кетүүгө аракет жасашат. Из кубарлар табелдик курал менен асманга ок атып, экөөнү кармап калышат. Экөө качып кеткенге үлгүрүшөт. Экөөнүн колуна кишен салып бөлүмгө алып келишсе, каракчылык тууралуу маалымат жаңы гана түшкөн экен. Булардан кийин көп өтпөй шериктери да колго түшүрүлөт.
Кылмышка шектүүлөр Бишкек шаарынын Ак-өргөө жаңы конушунун тургундары 1991-жылы туулган Акназар Адилбеков, 1990-жылы туулган Алым уулу Асан, 1989-жылы туулган Адилет Эсенкулов жана 1991-жылы туулган Борончу уулу Дуулат болуп чыгат. Алар отуруп келе жаткан машинаны жана башка жерге токтотуп коюшкан Хонда Одиссей үлгүсүндөгү автоунааны тинткен учурда ичинен белгисиз үлгүдөгү 2 тапанча, бет каптар, 2 бычак, темир жана жыгач таяктар табылган.

БЕКЕРЧИЛИКТИН “ЖОРТУУЛУБУ”?
Окуя тууралуу угуп, Октябрь РИИБине барганыбызда кылмышка шектүү балдар менен жолугуп, суроолорубузга жооп алууга үлгүрдүк. Алардын айтымында, бардыгы биринчи жолу кылмышка барып жатышат. Кызыгы, алардын бири “акча керек болуп каракчылыкка бардым” десе, бири “жөн эле бекерчиликтен барганмын” дейт. Бирок маалыматтарга караганда, "акча керек болуп кылмышка бардым" деген Акназардын ата-энеси ири ишкерлер.
Андан соң окуянын чоо-жайын жабырлануучунун өз оозунан угалы деп, кылмыш болгон жерден болжоштук. Тилекке каршы, “жабырлануучу өзү айтып бермек, бирок коркуп калыптыр. Окуянын кандай болгону тууралуу мен эле айтып берейин” деген фирманын аты жашыруун калуусун каалаган кызматкери төмөнкүлөргө токтолду:
– Ушуну менен Сергекке экинчи жолу кол салуу болуп жатат. Мындан бир ай мурун да ушундай кол салуу болгон. Бирок Сергек каршылык көрсөтүп, жакын турган дүкөнгө кире качып, акчаны алып калган эле. Акчаны алып кетпегендиктен, милицияга арыз жазган эмеспиз. Ошондо кол салгандар да ушул эле балдар болсо керек деген ойдобуз. Себеби ошондо кол салгандар кара түстөгү Хонда Одиссей үлгүсүндөгү автоунаа менен жүрүшкөн. Бул сапар да кармалган балдардын экинчи автоунаасы кара түстөгү Хонда Одиссей болгон. Бирок кол салгандар мында да, ошол убакта да бет капчан болушкандыктан, ушулар деп так айта албайбыз.

“БУЛ ТОП БУГА ЧЕЙИН ДА КАРАКЧЫЛЫККА БАРЫП ЖҮРГӨН”
Ал эми Октябрь РИИБинин жетекчиси Рафик Мамбеталиев бул топтун биринчи эле кылмышы эмес деп эсептейт.
– Маалымат түшөр замат атайын опертоп жөнөп кеткен. Аларды таап, кармоо учурунда биздин оперкызматкерлерге каршылык көргөзүп, качып кетүүгө аракет кылышкан. Кармалган балдардын автоунаасын тинткен учурда ичинен белгисиз үлгүдөгү 2 тапанча, 4 уюлдук телефон, бет каптар, атайын жасалган жыгач, темир таяктар табылган.
Оперативдүү маалыматтар боюнча, бул кылмыш тобунда булардан башка да мүчөлөрү бар. Алар буга чейин да бир нече жолу каракчылык кылып жүрүшкөн. “Ким кайсы жакка акча ташып жатат?” деген сыяктуу маалыматтарды да жакшы билишкен. Орусча айтканда, булар “наглеть” этип кеткендиктен, бет кап тагынып алып күндүз эле тоноп жүрүшкөн. Учурда иликтөө амалдары жүрүп жатат, калган мүчөлөрүн кармагандан кийин башка да кылмыштарга тийиштиги бар экендигин тактайбыз. Октябрь РИИБинин тергөө бөлүмү тарабынан Кылмыш жана жаза кодексинин 168-беренеси (каракчылык) боюнча кылмыш иши козголгон. Эгер сүрөттөгү жигиттерден жапа чеккендер болсо, бизге төмөнкү телефондор аркылуу кабарлап коюшса:
(0312) 54-41-16, 43-32-75

ШЕКТҮҮНҮН БИРИ БОШТОНДУКТА
Макала даярдалып жатканда биз кылмышка шектүү делген жигиттердин бири (оперкызматкерлердин айтымында, топтун уюштуруучусу) Акназар Адылбековду белгисиз себептер менен Октябрь райондук сотунун Камбаралиева аттуу судьясы эч жакка чыкпоо кепилдиги менен чыгарып жибергенин уктук. Кармалгандардын үчөөсү СИЗОдо. Таламандын так түшүндө тоноочулукка барганын айтып отурган жигитти неге бошотуп жибергени белгисиз. Балким, чындап эле “күнөөсү” башкалардыкынан азыраакпы же аты жакшы акча роль ойноп кеттиби, ким билет...