2014-жылдын 1-январынан тартып Орусияга кирүү-чыгуу тартибине жаңы өзгөртүүлөр киргизилгенин Кыргызстандын Орусиядагы элчилиги маалымдады. Ага ылайык, аталган өлкөдө иштөөгө уруксат берүүчү документи жана патенти жок туруп, визалык режим каралбаган өлкөлөрдөн келген мигранттарга, анын ичинде Кыргызстандын жарандарына да Орусиянын аймагында жүрүү мөөнөтүнө чек коюлат.

– Мигранттардын Орусияда жүрүү мөөнөтү кандай тартипте өзгөртүлдү?
-Буга чейин мигранттар Орусияга келип, 90 күнгө чейин иш издеп же мыйзамсыз эмгектенип келишкен. Бул мөөнөт аяктаган соң Орусия Федерациясына жакын жайгашкан мамлекеттердин бирине, мисалы, Украинага чыгып, кайра Орусияга кирүү менен кайрадан 90 күн жүрүү мөөнөтүнө ээ болушчу. Эми мындай жол менен мөөнөттү узартып алуу мүмкүн эмес. Жаңы тартипке ылайык, 90 күндөн кийин чыгып кеткен адам Орусияга дагы 90 күн өткөн соң гана кире алат. Мыйзамдуу түрдө жүрүү үчүн мигрантта иштөөгө уруксат кагазы, ишкердик кылууга патенти, жашоого уруксат берилгени боюнча документтери болушу керек.

– Орусияда убактылуу жүрүү мөөнөтүн кантип узартса болот?
-Ал үчүн убактылуу жашоого уруксат, иштөөгө уруксат кагазын же патент алуу керек. Көрсөтүлгөн бардык документтер Орусиянын федералдык миграциялык кызматынын органдары аркылуу каттоодон өтөт.

– «Кара тизмеде» бар-жогумду кай жактан биле алам?
-Орусияга барганга чейин аталган өлкөгө кирүүгө тыюу салынбаганын сөзсүз аныктап алууну сунуштайбыз. Ал үчүн Орусиянын федералдык миграциялык кызматынын
(fms.gov.ru) сайтына баш багып, өзүңүздүн аты-жөнүңүздү жана башка документтик маалыматыңызды киргизүү аркылуу текшерип көрүңүз.

– Тартипти бузган мигрант кандай жазага тартылышы мүмкүн?
-Орусияда жүрүү мөөнөтүн бузган чет жердик жаранга Орусия Федерациясынын аймагына 3 жылга чейин кирүүгө тыюу салынат. Мисалы, жаран Орусияга 2014-жылдын 1-январында келди. Ал жети иш күнүнүн ичинде 90 күндөн турган убактылуу каттоого турушу керек. Орточо анын мөөнөтү 31-мартта аяктайт, бирок ал күнгө чейин жаран Орусиядан чыгууга жетишпей калды дейли. Убактылуу каттоо мөөнөтү аяктаган соң Орусиядан чыккан жаран аталган өлкөгө кайра кирерде чек арачылар «сизге Орусиянын аймагына кирүүгө уруксат жок» деп кабарлашат.
Ошондой эле Орусияда жүргөн чет жердик жаран миграциялык картасын, убактылуу каттоосун жоготуп алып, бул боюнча полиция кызматкерлери менен миграциялык органдарга кайрылбаганы үчүн да жоопкерчилик күчөтүлдү. Мындай тартип бузууга ал жаран 2 миңден 5 миң рублга чейинки айып пулга жыгылып, Орусиядан чыгарылат. Ал эми Москва жана Ленинград облусунда жашап, жогорудагыдай эле тартип бузуулар үчүн 7 миң рублга чейин айып пул төлөп, өлкөдөн милдеттүү түрдө депортацияланат.

Болот уулу Эржан
politika@super.kg