Мурунку премьер-министр Сапар Исаков 26-апрелде Улуттук коопсуздук мамлекеттик комитетине суракка чакырылды. УКМКнын маалыматына караганда, Сапар Исаков Бишкек жылуулук электр борборун модернизациялоо боюнча козголгон кылмыш ишинин алкагында күбө катары суракка чакырылган. Исаков сурактан чыккан соң "президенттик аппаратта иштеген убактагы жумуштарым боюнча кээ бир суроолорду берди. ЖЭБ боюнча менин күнөөм жок" деп комментарий берди.
26-январда Бишкек ЖЭБинде өндүрүштүк кырсык болуп, шаардыктар 1 апта жылуулуксуз калышкан. Бул окуядан улам Кытайдан карызга алынган 386 миллион долларга ЖЭБди жаңылоодо көп күмөндүү иштер орун алганы маалым болгон. ЖЭБди жаңылоо, анда болгон авария боюнча кылмыш иштери козголуп, тергөөнүн жүрүшүндө бир топ жооптуу кызматкерлер кармалган. Алар: "Электр станциялары" ишканасынын жетекчисинин мурдагы биринчи орун басары Бердибек Боркоев, "Электр станциялары" ишканасынын техникалык директору Алмаз Жусупбеков, "Электр станциялары" ишканасынын модернизациялоо тобунун жетекчиси Темирлан Бримкулов, "Электр станциялары" ишканасынын башкы директору Узак Кыдырбаев, "Электр станциялары" ишканасынын мурдагы жетекчиси Салайдин Авазов, "Электр станциялары" ишканасынын жетекчисинин мурдагы орун басары Жолдошбек Назаров, "Улуттук энергетикалык холдинг" компаниясынын мурдагы төрагасы Айбек Калиев.
Жакында айрым маалымат булактары "Айбек Калиев тергөө менен иштешүүгө барып, айрым маалыматтарды ачыктай баштады. Дагы кимдер камакка алынат?" деп жазып чыккан.

Бектур Токтоноев
politika@super.kg