15-октябрь, 1960-жылы Жогорку Кеңештин депутаты Чыныбай Турсунбеков төрөлгөн

Жогорку билимдүү. 1983-жылы Кыргыз мамлекеттик университетинин филология факультетин артыкчылык менен бүтүргөн. Ал эми 1985-1988-жылдары Кыргыз илимдер академиясынын аспирантурасында окуган. 1988-жылы кандидаттык диссертациясын жактап, “филология илимдеринин кандидаты” илимий даражасына ээ болгон. Андан соң 2004-жылы Тышкы иштер министрлигинин Дипломатиялык академиясын бүтүргөн.

Эмгек ишмердүүлүгүн 1983-жылы баштап, 1985-жылга чейин “Кыргызстан” басмасынын саясий адабият редакциясында редактор, улук редактор болуп иштеген.

1989-1992-жылдары – КМУУнун Кыргыз филологиясы жана журналистикасы факультетинде окутуучу, улук окутуучу, декандын орун басары,

1993-1994-жылдары – Кыргыз Республикасынын Элге билим берүү министрлигинин Түркиядагы өкүлү,

1994-2010-жылдары – жеке ишкер,

1995-1997-жылдары – Түркиянын Тышкы иштер министрлигине караштуу ТИКАда Кыргыз мамлекети боюнча адис, “Манас-1000” мамлекеттик комитетине караштуу “Манас дастаны” филиалынын директору, “Азаттык” радиосунун Түркия боюнча кабарчысы,

1997-2010-жылдары – “Акун” ЖАКынын башкы директору, ошондой эле “Бишкек ун комбинаты” ААКсынын Директорлор кеңешинин төрагасы, “Кереге” АКсынын Директорлор кеңешинин төрагасы, Кыргыз Республикасынын Ишкерлер бирлигинин президенти,

ДЕИК кыргыз-түрк ишкердик кеңешинин тең төрагасы болгон.

2010-жылдын октябрында Кыргызстан Социал-демократиялык партиясынын тизмеси боюнча V чакырылыштагы Жогорку Кеңештин депутаты болуп шайланган. Жогорку Кеңештин Адам укуктары, конституциялык мыйзамдар жана мамлекеттик түзүлүш боюнча комитетинин мүчөсү. Жогорку Кеңештин КСДП парламенттик фракциясынын лидери.