Кыргызстанда 2015-жылдын октябрь айында пенсиянын орточо көлөмү 4728 сом болору айтылды

Жогорку Кеңеш 11-февралда “Кыргызстандын Социалдык фондунун 2015-жылга бюджети жана 2016-2017-жылдарга божомолу жөнүндө” мыйзамдын долбоорун карап, 1-окууда добуш берүүгө жөнөттү.

Соцфонддун төрагасы Мухаммедкалый Абылгазиевдин айтымында, 2015-жылдын бюджет долбоорунун киреше бөлүгүндө 40 миллиард 449 миллион сом, 2016-жылы 42 миллиард 324 миллион сом, 2017-жылы 45 миллиард 641 миллион сом өлчөмүндө каражат каралып жатат. 2015-жылы 128,8 миллион сом өлчөмүндө каржы калдыгы болору күтүлүүдө. Ал 2016-жылдын бюджетине которулат.

Андан сырткары 2015-жылдын октябрь айында пенсия өлчөмү жогорулап, орточо пенсия 4728 сомду түзө турганы айтылды. Ал үчүн бюджет долбоорунда 450 миллион сом каралды. Республикалык бюджеттен да кошумча каражат суралышы мүмкүн.