Кыргызстандагы кытайлык компаниянын кызматкерлери "укук коргоочу Токтайым Үмөталиева шылуундарды жактап, инвесторлорду качырып жатат" дешти

Биоактивдүү кошулмалары бар азыктарды сатуу менен алектенген кытайлык “ИПАР” компаниясынын кызматкерлери укук коргоочу Токтайым Үмөталиевага болгон нааразычылыгын бүгүн, 12-февралда берген маалымат жыйынында билдиришти. 

Алардын айтымында, Т.Үмөталиева кытайлык ишкердин Кыргызстанга салган ишканасын рейдерлик жол менен басып алган Хуршида Исмаилова деген Кыргызстандын жаранын жактап, Кыргызстандын инвесторлорун качырууда. Исмаилова компаниянын жетекчиси катары катталып алып, кызматкерлер үчүн салынган турак жайдын келишимдерин өзгөртүп, үстөк пайыз кошуп алганын айтышты.

“Исмаилова компанияда эсепчи катары иштеп жүргөн, кийин компаниянын ээси ишкананы анын атына каттатып койгон. Бүгүнкү күндө компанияны кайра инвестордун өзүнө бербей жатат. Биз кайра кайтарып берүүсүн талап кылып жатабыз. Укук коргоочу Токтайым Үмөталиева Кыргызстанга зыян алып келгендерди жактап, бизди "лицензиясы жок" деп негизсиз айыптап, инвестициялык климатка зыян алып келүүдө. Ошондой эле "компаниянын артында чиновниктер турушат" деп айтууда. Бул карандай калп. Компания Кыргызстандагы татаал кырдаалдарга карабай 8 миллион долларлык инвестиция салып, завод курган. Бул Кыргызстандын экономикалык ири булагы. Ошондой эле Исмаилова компаниянын Бишкектеги жерин тартып алган. Биз бул жерге завод курушубуз керек эле, ишибиз токтоп турат. Компания бизге эки көп кабаттуу үй салып берген”,- дешти компания кызматкерлери.

Исмаилова “алдамчылык кылды, анын айынан чет элдик инвестор жабыркады” деген негиз менен 9 ай мурун убактылуу кармоочу жайга камалган.