Академик Сабыр Жумабеков казак кыздын бутун 18 сантиметрге узартты

Бишкектеги Травматология жана ортопедия илим изилдөө борборунда академик, белгилүү ортопед Сабыр Жумабеков Казакстандын Шымкент облусунун Жаңы-Базар айылынан келген 18 жаштагы кыздын бутуна операция жасап, 18 сантиметрге узартты. Бул тууралуу SUPER.KG порталына кыздын апасы билдирди. 

Анын айтуусуна караганда, кызы Карлыгаш Курбанова 7 жашка чыкканда сол кашка жилиги ооруй баштаган. Врачтар текшерип көрүп, “остеомолит” (сөөктүн чирий башташы) деген диагноз коюшат. Ата-эне кызын дарттан айыктыруу үчүн Алматы, Ташкент, Орусия (академик Г.А.Илизаров атындагы Калыпка келтирүүчү травматология жана ортопедия илимий борбору) жана башка өлкөлөргө алып барып көрсөтүп, дарылатышат. 18 жашка чейин Карлыгаш башынан 8 операцияны өткөрүп, ар бир операция сайын ооруган буту уламдан-улам кыскарып жүрүп отурат. Акыры алар Сабыр Жумабеков тууралуу угуп, кызын алып келип көрсөтүп, ооруканага жаткырышат. 2015-жылдын 14-январында кызга операция жасалган. Кыздын кыска бутуна атайын темирден аппараттар орнотулуп, бут сөөгүнүн өсүшүнө өбөлгө түзүлгөн. Операция жана карап-дарылоонун жыйынтыгында кыздын буту 18 сантиметрге узарган. Учурда үйүнө чыгарылган кыздын абалы жакшы.

Сабыр Жумабеков бул тууралуу: “Казакстандан Карлыгаштан соң операция үчүн келип жаткандар мурункудан да көбөйдү. Карлыгаш дагы 2 айдан соң текшерилгени келет. Учурда балдак менен басат, 6 айдан кийин чуркаганга жарап калат”,- дейт.