Ысык-Көлдөн Сириядагы согуштук аракеттерге 12 адам кеткени айтылууда

Ысык-Көл облусунан Сириядагы согуштук аракеттерге кеткендердин саны 12 адамды түзүүдө. Бул тууралуу бүгүн, 13-февралда SUPER.KG порталына облустук милициянын маалымат катчысы Сталбек Усубакунов билдирди. 

"Учурда Сирияга Ысык-Көлдүн аймагынан 12 адам кеткени аныкталды. Алардын арасында аялдар да бар. Бүгүнкү күндө Каракол шаарынан 4, Тоңдон 2 адам кеткени белгилүү болду. Кеткендердин ичинен бешөө үй-бүлө (аялы-күйөөсү) жана дагы 2 жаран. Учурда аймакта мындай иш-аракеттердин алдын алуу боюнча тиешелүү иш-чаралар жүрүүдө",- дейт С.Усубакунов.    

Айта кетсек, буга чейин Ички иштер министрлиги билдиргендей, өлкө аймагынан Сирияга кетүү агымы 2012-жылдары башталган. Бүгүнкү күндө ал жакка кеткендердин расмий саны 200-300 адамга чукулдады. Ал эми расмий эмес маалыматтарга ылайык, ал жакка кеткендердин саны мындан да көп. Жүргүзүлгөн иликтөө иштеринин натыйжасында Сирияга үй-бүлөсү менен, ымыркай балдары менен кеткендер да бар. Алардын басымдуу бөлүгүн түштүк аймактын тургундары түзүүдө.