Өзгөндө таякелери тарабынан 15 жаштагы кыздын зордукталышы боюнча тергөө иштери аяктап, сотко жиберилди

"Туугандарынын дагы бири депкирди ысытып, кыздын денесине басканы айтылган эле. Экспертизанын жыйынтыгы менен бул да аныкталды. Бирок учурда ал аял "кыздын зордукталганын билген эмесмин" деп айтууда. Ал аялга карата да "кыздын денесине залал келтирген" деп КРнын Кылмыш-жаза кодексинин 112-беренеси боюнча кылмыш иши козголду. Кызды эки жыл бою коркутуп, жыныстык катнашка мажбурлап жүргөн 65 жаштагы жаран, анын 36 жана 22 жаштагы балдарына карата козголгон кылмыш ишинин тергөөсү аяктады. Учурда бул 4 жарандын үстүнөн тергөө амалдары толук аяктап, иш азыркы тапта соттук кароого жөнөтүлдү",- дейт Ж.Ашырбаев.

Эске салсак, өткөн жылдын 8-декабрь күнү 47 жаштагы облус тургуну милицияга кайрылган. Анда ал 2010-жылдын жазында 10 жаштагы кызын бир тууган таякеси Раимжан жана анын Усу, Мики аттуу балдары зордукташканын айткан. Иликтөө иштеринин алкагында кыздын зордукталганы аныкталган.