Кыргызстанда 33 миң салык төлөөчү бирдиктүү салык декларациясын тапшырды

2015-жылдын 17-февралына карата 33 752 салык төлөөчү бирдиктүү салык декларациясын тапшырды, анын ичинен 6926сы уюмдар, 12 902 жеке ишкерлер жана 13 744 жеке жактар. Бул тууралуу 18-февралда Мамлекеттик салык кызматы билдирди. 2-мартка чейин ата мекендик уюмдар, дыйкан жана фермердик чарбалар, туруктуу мекемесин түзүү менен Кыргызстандын аймагында иш жүргүзгөн чет өлкөлүк уюмдар бирдиктүү салык декларациясын берүүгө милдеттүү.

"31-мартка чейин мамлекеттик кызматкерлер, жеке ишкерлер (анын ичинде патенттик негизде салык төлөгөндөр), кыймылдуу (транспорт) жана кыймылсыз (батир жана үй) мүлкү жана жер тилкеси (короо-жай тилкелеринен башка) бар жеке жактар, юридикалык жакты түзбөй туруп ишмердиктерин ишке ашырышкан дыйкан жана фермердик чарбалар бирдиктүү салык декларациясын берүүгө милдеттүү",- деп билдирет мекеме.

Декларацияны өз убагында тапшырбаган жеке жактарга 2000 сом, юридикалык жактарга 5000 сом өлчөмүндө административдик айып салынат.