Эл аралык күрөш федерациясынын өкүлдөрү бел боо күрөшү боюнча Кыргызстанда ири мелдеш уюштурууну сунушташты

Кечээ, 17-февралда Дене тарбия жана спорт агенттигинин директору Кадырбек Эргешов Эл аралык күрөш федерациясынын президенти Руслан Махмутов жана аталган уюмдун вице-президенти Ислам Албаков менен жолугушту.

Аталган агенттиктен кабарлашкандай, жолугушуунун жүрүшүндө Р.Махмутов Күрөш федерациясынын акыркы жылдагы ийгиликтери тууралуу айтып берди. Ошондой эле ал бел боо күрөшү боюнча Кыргызстанда мелдеш өткөрүү сунушун айтты. Өз кезегинде К.Эргешов бул сунушту жакын арада карай турганын айтып, бул спорт түрүн өнүктүрүүдө мамлекеттик агенттик колдоо көрсөтөрүн белгиледи. Жолугушуунун жыйынтыгында Эл аралык күрөш федерациясынын өкүлдөрү эстеликке ала келген белектерин тапшырышты.

Жолугушууга Дене тарбия жана спорт мамлекеттик агенттигинин статс-катчысы Нуржан Бардинова жана КРнын Бел боо күрөшү боюнча федерациясынын президенти Камчыбек Жолдошбаев да катышышты.