Ат-Башы районунда атасын мыкаачылык менен өлтүргөн жаран кармалды

Ат-Башы районунда “атасын мыкаачылык менен өлтүргөн” деп шектелип 27 жаштагы жаран кармалды. Бул тууралуу бүгүн, 18-февралда Нарын облустук ички иштер башкармалыгынан билдирди.

Маалыматка караганда, 16-февралдан 17-февралга караган түнү Ат-Башы айылындагы турак үйлөрдүн биринен 1958-жылы туулган Тентимиш Айдаркановдун жансыз денеси табылган. Аны кароо учурунда маркумдун мыкаачылык менен өлтүрүлгөнү аныкталган. Бул боюнча иликтөө иштери жүрүп, кылмышка шектүү катары 1988-жылы туулган Т. уулу К. аттуу жаран кармалган. Учурда тиешелүү экспертизалар дайындалып, тергөө амалдары жүрүп жатат.

Алдын ала маалыматтар боюнча, үй-бүлө чыр-чатагынан улам 1988-жылы туулган жаран мас абалында атасын ур-токмокко алган. Алган жараатынан улам жабырлануучу ошол жерден каза тапкан.