Эркин Рыскулбеков, Мирбек Атабеков жана Салтанат Саматова рак илдетине кабылган өспүрүмгө барып, айыгып кетүү үмүтүн бекемдеп келишти

Эркин Рыскулбеков, Салтанат Саматова жана Мирбек Атабеков рак илдети менен ооруп, ооруканада дарыланып жаткан 14 жаштагы Арстанга барып, айыгып кетүү үмүтүн бекемдеп, көңүлүн көтөрүп кайтышты. Бул тууралуу “2014-жылдын супер ТВ персонасы” наамынын ээси Эркин Рыскулбеков SUPER.KG порталына бүгүн, 19-февралда билдирди.

“Арстан рак илдети менен ооруп жаткандыктан, колумдан келген жардамымды берип турчумун. Бирок өзү бул ооруга кабылганын билчү эмес. Ага лейкоз деп эле айтып коюшкан. Интернеттен эмне оору экенин билип алып, маанайы чөгүп, депрессияга кабылыптыр. Арстандын маанайын көтөрүп келүү максатында жакшы көргөн ырчысы Мирбек Атабеков жана азыркы тапта аталган илдет менен күрөшүп келген белгилүү алып баруучу Салтанат Саматова эжекебиз болуп чогуу бардык. Мирбек Атабеков балага шарият тууралуу айтып берип, кийип турган баш кийимин белекке берди. Ал эми Салтанат эже “Сен антип көңүлүңдү чөктүрбө, эч нерсе болбойт, ал сасык тумоодой эле. Мына мен деле ооруп жатам, мен дагы химиотерапия алып келем” деп кийме чачын чечип көрсөттү. Бул жолугушуудан соң Арстан кайраттуу болуп, кубанып калганын анын атасы менен дарыгери айтышты”,- деди Эркин Рыскулбеков.