Кыргыз Республикасынын Салык кодексине толуктоолор киргизилди

КРнын Президенти Алмазбек Атамбаев Салык кодексине толуктоолорду киргизүү тууралуу мыйзамга кол койду. Бул тууралуу президенттин басма сөз кызматы билдирди.

Маалыматка караганда, аталган мыйзам Жогорку Кеңеш тарабынан 2015-жылдын 29-январында кабыл алынган.

Мыйзамдын максаты коммерциялык банктардын төлөм системдеринин инфраструктурасын кеңейтүү жолу менен Кыргыз Республикасында накталай акча түрүндө эмес төлөмдөрдүн өлчөмдөрүн көбөйтүү болуп саналат. Мыйзамда банк жабдууларын (банкоматтар, POS-терминалдар, төлөм терминалдары жана банк күркөлөрү) импорттоодо КНС төлөөдөн бошотуу каралат. Мыйзам убактылуу мүнөзгө ээ жана 2017-жылдын 31-декабрына чейин колдонулат. Мыйзам расмий жарыяланган күндөн тартып 15 күн өткөндөн кийин күчүнө кирет.