"Ата Мекен" партиясынын депутаттары Ата Мекенди коргоочуларды куттукташты

Бүгүн, 21-февралда Кант шаарынын Маданият үйүндө Ата Мекенди коргоочулардын күнүнө карата майрамдык иш-чара өтүп жатат. Анда "Ата Мекен" социалисттик партиясынан Жогорку Кеңештин депутаттары Наталья Никитенко, Ташполот Балтабаев, Асия Сасыкбаева, Туратбек Мадылбеков, Райкан Төлөгөнов, Бактыбек Калмаматов аскер кызматкерлерин куттуктап өтүштү.

Н.Никитенко өз сөзүндө Ата Мекенди коргоочулардын күнүн майрамдоо бир гана Кыргызстанда эмес, башка өлкөлөрдө сакталып келгендигин билдирди. "Бул күн баарыбызды мекенчилдик, адилеттүүлүккө ишеним, ардагерлерди терең урматтоо менен бириктирет. Биз бүгүн депутат аялдардын атынан Ата Мекенди коргоочуларга болгон сүйүүбүздү, сый-урматыбызды тартуулап жатабыз. Анткени эркектер биздин ишенимибизди жана колдообузду ар дайым сезип турушканы туура",- деди Никитенко.

Депутат А.Сасыкбаева өз сөзүндө аскер кызматкерлеринин аялдарына кайрылып буларды айтты: "Үй-бүлөдө күн сайын жылуулукту, бири-бирине болгон ишенимди сактоо - чоң эмгек. Ошондуктан сиздерге сабырдуулук, бакыт каалайм. Үйүңөрдө ар дайым сүйүү жашасын".

Айта кетсек, иш-чарада ардагерлер кеңешинин өкүлдөрү, Канттагы авиабазанын аскер кызматкерлери, жергиликтүү кеңештердин депутаттары катышууда.