Акыйкатчы жөнүндө мыйзамга өзгөртүү киргизилүүдө

Бишкекте 27-февралда "КРнын Акыйкатчысы жөнүндө" мыйзам долбоору боюнча коомдук угуу өтөт. Парламенттен 25-февралда билдиришкендей, иш-чараны ЖКнын Адам укуктары, конституциялык мыйзамдар жана мамлекеттик түзүлүш комитети уюштурууда. Долбоорду депутаттар, БУУнун өкүлдөрү, эксперттер талкуулашат. Аталган мыйзам долбоору менен:

- акыйкатчыны шайлоо жана кызматтан бошотуу тартиби аныкталат;

- акыйкатчынын укуктук статусу, ыйгарым укуктары, мамлекеттик жана башка органдар менен кызматташуусу аныкталат;

- акыйкатчынын ишмердүүлүгүнүн негизги багыттары жана принциптери мурункудан ачык-айкын белгиленет;

- акыйкатчы кызматына жана анын орун басарлыгына талапкер жылдыруу тартиби такталат жана башка. Мыйзам долбоору беш бөлүктөн турат, алар: жалпы жобо, акыйкатчыны жана анын орун басарларын шайлоо жана кызматтан бошотуу тартиби, акыйкатчынын компетенциясы, акыйкатчынын мамлекеттик органдар, жергиликтүү бийлик жана башка мекемелер менен кызматташуусу, акыйкатчынын ишмердүүлүгүн уюштуруу.