“Эшектин эттери тууралуу окуя коомчулукка тарагандан бери кардарлар кескин азайды” дешет кафе ээлери

Эшек эти тууралуу окуя коомчулукка чагылгандай тараган соң, борбордогу тамактануучу жайлар чыгашага учурай баштады. Бул тууралуу бүгүн, 26-февралда борбордогу уйгур, кытай жана улуттук тамак-аш даярдоочу кафелерди текшерүү учурунда белгилүү болду. 

Текшерүүгө алынган борбордогу эң белгилүү самсакананын ээси Канат Камчыбеков: “Эшектердин эттери тууралуу окуя элге тарагандан бери кафеге келген кардарлардын саны 15 пайызга азайды. Тааныштарыбыз телефон чалып “Силер эшектин этинен жасаган жоксуңарбы?” деп тамаша-чынга салып жатышат. Мындай жагдай менин эле тамактануучу жайымда болуп жаткан жок. Учурда борбордогу бардык тамактануучу жайлар зыянга учуроодо. Биздин жүздөгөн такай келүүчү кардарларыбыз бар, өзүбүз жасаган тамак-ашты өзүбүз да, балдарыбыз да жейт. Анан кантип алдайбыз?”- деди.

Бүгүн Мамлекеттик ветеринария жана фитосанитария кызматы тарабынан борбордогу кафе жана тамактануучу жайлар текшерүүгө алынды. Анда тамактануучу жайлардагы колдонулган эттердин тиешелүү документтери текшерилди. Айрым маалымат каражаттары “текшерүү алдында инспекция тарабынан кафе ээлерине эскертилген жана алдын ала сүйлөшүлгөн” деп жазып чыгышты. Бирок журналисттердин сунушу менен барган кафелерде бардык тиешелүү документтер бар экени аныкталды.

Бишкек шаардык ветеринардык жана фитосанитардык коопсуздук боюнча аймактык инспектор Мирлан Мураталиевдин айтымына караганда, самса жасоочу жай, алар пайдаланган эт-майлар 3 күндө бирден текшерилип турат. 

"Азыркы учурда дүң болуп жаткан эшек эттери мен жетектеген аймакта жок, катталган дагы эмес. Мен бул жерде 4 жылдан бери иштейм. 3 күндө бирден келип бардык документтерин текшерип кетип турабыз. Эшектин эти бул аймакка алынып келген эмес",- дейт М.Мураталиев.