Эшек этинин кафе-ресторандарга жайылышына каршы тынч митинг өтөт

Жарандардын тобу эшек этинин кафе-ресторандарга жайылышына каршы тынч митинг өткөрүшөт. Бул тууралуу бүгүн, 26-февраль күнү маалымат жыйынында борбордун тургуну Таалайбек Керималиев билдирди. Анын айтымында, Ак-Жол айылындагы эшектерди сойгон цехтин алдында өтө турган митингге миңге жакын адам катышат. 

“Бизге ошол цехтин ээлери тоңдурулуп, сакталып турган эшектердин эттерин көрсөтүшсүн. Менин оюмча, бул эттер эбак тарап, жок болуп кеткен. Эгер алар өз ордунда болсо, укук коргоо органдарынан ошол малдын этин биздин көзүбүзчө өрттөшүн талап кылабыз. Кыргыздар эч качан эшектин этин жешкен эмес. Куранда да жазылган, адам өлүп бараткан учурда гана эшектин этин бир аз жегенге болот”,- дейт Керималиев.

Маалымат жыйынына Кара-Балта шаарынын жана Ат-Башы районунун тургундары катышышты. Тынчтык митинги эртең Ак-Жол айылындагы эшек союлган ишкананын алдында өтөт.