Анапияевдин өлүмүнө шектелген Айбек Абдразаковдун кармалганын Беларустун Тергөө комитети тастыктай элек

Анапияевдин өлүмүнө шектелген Айбек Абдразаковдун кармалганын Беларустун Тергөө комитети тастыктай элек. Бул тууралуу бүгүн, 26-февралда беларустук маалымат каражаттары жазышты.

Маалыматка караганда, аталган комитетке Айбек Абдразаковдун кармалганы боюнча эч кандай маалымат келип түшкөн эмес.

Айта кетсек, бүгүн маалымат жыйыны учурунда Алманбет Анапияевдин өлүмү боюнча күбө катары суралып жаткан Гүлжигит Абилазизовдун жактоочусу Кайрат Загибаев "Алманбет Анапияевдин өлүмүнө шектелип жаткан Айбек Абдразаков Беларусь милициясы тарабынан кармалды" деп билдирген.

Эске салсак, 18-февралда Беларусь ММКлары Минск шаарындагы көчөлөрдүн биринен белгисиз адамдын мууздалып өлтүрүлгөн жансыз денеси Мерседес унаасынын багажнигинен табылганын жазышкан. Ошондой эле жансыз дененин жанында Анапияевдин сүрөтү чапталган Шакиров Алмазбек Мийзамовичтин атына берилген паспорт да болгон. 

Окуя болгон күнү Алманбет Анапияевдин жанында жүргөн Гүлжигит Абилазизов милиция кызматкерлерине 25-февралда көрсөтмө берип, Анапияевдин өлүмүнө шектүү катары бир канча сүрөттүн ичинен экс-президент Курманбек Бакиевдин бир тууганы Жаныш Бакиевдин, ИИМдин Уюшкан кылмыштуу топко каршы күрөшүү башкармалыгынын мурунку башчысы Айбек Абдразаков жана Жаныш Бакиевдин чечен улутундагы жан сакчысы Рустам Сайдуевдин сүрөтүн көрсөткөн.