Депутат: "Өзгөндөгү Төөчү аймагына заманбап тоо-лыжа базасын курууга бизде толук шарт бар"

"Өзгөн районундагы Төөчү аймагына заманбап тоо-лыжа базасын курууга бизде толук шарт бар",- деп билдирди депутат Абдимуктар Маматов 27-февралда SUPER.KG порталына. Демилгечи депутат бул лыжа базасы курулса, республиканын түштүгүнө келүүчү туристтердин саны өсөрүн айтты. "Бул жер деңиз деңгээлинен 2000-2200 метр бийиктикте туруп, кар калың түшүп, Ош, Өзгөн шаарларына эң жакын жайгашкан жана коңшулаш Өзбекстан менен Тажикстанды өзүнө тарта турган ыңгайлуу база болуп каларына ишендирип кете алам",- деди Маматов. Депутат жакында эле Жогорку Кеңештин Экономикалык жана фискалдык саясат комитетинин мүчөлөрү Төөчү аймагын жеринен барып көрүп келгенин кошумчалады. "Депутаттар Төөчү аймагын жана Өзгөн шаарындагы 11-12-кылымдарга таандык, 1 мунарадан жана 3 күмбөздөн турган Өзгөн архитектуралык тарыхый комплексин көрүп келишти. Тарыхый комплексти ЮНЕСКОнун Бүткүл дүйнөлүк мурастар тизмесине киргизүүнү сунуш кылып, комитеттин көчмө жыйынында каралып, өкмөткө сунуштарды тез арада чечүү боюнча ар тараптуу аракеттерди көрүүсүнө багытталган чечими кабыл алынды",- деди ал.