Чүй облусунда жана Бишкекте 16-марттан тарта кызамык жана кызылчага каршы эмдөө башталат

Чүй облусунда жана борбор калаада 16-марттан 28-мартка чейинки аралыкта кызамыкка жана кызылчага каршы эмдөө өтөт. Бул тууралуу бүгүн, 3-мартта SUPER.KG порталына Республикалык эмдөө борборунун директору, иммунолог Жолдош Калилов билдирди. 

"Эмдөө алгач Бишкек жана Чүй облусунда 7 жаштан 20 жашка чейинки балдар арасында, андан соң этап-этап менен өлкөнүн башка аймактарында да жүргүзүлөт. Ага жалпысынан апрель айына чейин 1,7 миллион доза алынып келинет", - деди Жолдош Калилов. 

Анын айтымында, эмдөөнүн экинчи этабында аймактарда 1 жаштан 20 жашка чейинки балдар, мектеп окуучулары, андан сырткары орто жана жогорку билим берүүчү мекемелердин кызматкерлери да эмдөөдөн өтмөкчү. 

Айта кетсек, 12-февралда кызамыкка жана кызылчага каршы 840 миң доза вакцина, башкача айтканда, 2835 килограмм салмактагы эмдөөчү каражаттар ЮНИСЕФ аркылуу алынып келинген. Маалыматка караганда, учурда 5736 адам аталган вирусту жуктуруп алган.