Коомдук кыймыл: “Депутаттар кызматтык унаалардан жана башка чыгым алып келген жеңилдиктерден баш тартышсын!"

"Жалпы калкыбыздын жашоо деңгээли кейите турган абалда турганда эмнеге депутаттар элдин эсебинен олчойгон айлыктарды алып, кымбат унааларды тебиши керек? Депутаттар эл менен тең болушу керек". Бул тууралуу бүгүн, 4-мартта маалымат жыйынында “ЖКнын депутаттарынын жеңилдиктери жана артыкчылыктары жоюлсун” аттуу коомдук кыймылынын өкүлү, юрист Тамерлан Ибраимов билдирди. Анын айтымында, Жогорку Кеңештин депутаттары кызматтык унааларынан баш тартуусу керек, алардын айлыктары кыскартылышы кажет.

“KG номурларынын эмне кереги бар, алар эмнеге элден башкача болушу керек? Аларга коомдук транспортто жүрүү бекер, демек, башка мамлекеттик кызматкерлер: мугалим, дарыгерлер сыяктуу жөө жүрүшсүн. Биз унаалардын кымбаттыгына каршы чыгып жаткан жокпуз, ошол эле бир унаага өзүнчө айдоочу, өзүнчө механик каралган, баары биригип аягында чоң сумманы чапчыйт.

Биз депутаттарга каралган 7 жеңилдик жана артыкчылыкка каршы чыгып жатабыз”,- дейт Ибраимов.