Коомдук активист: “Депутаттар жеңилдиктеринен баш тартышпаса, референдум өткөрөбүз”

“Депутаттар парламенттик шайлоого өтүш үчүн миңдеп саналган акчаларды коротушат, мунун баары эмнеге деген ой жаралат? Алар эптеп депутат болуп алып, анан 5 жыл бою элдин акчасына даяр үйдө жашап, кымбат унаа тээп, алар үчүн атайын делген санаторийлерде эс алып, чет өлкөгө чыгууну көздөшөт”. Бул тууралуу бүгүн, 4-мартта маалымат жыйынында журналист Азамат Тынаев билдирди. Анын айтымында, бул көтөрүлүп жаткан сөздөргө депутаттар көңүл бурушпайт. Андыктан алардын жеңилдиктерин эл өзү референдум өткөрүп, жоюп салышы керек.

“Референдум өткөрүү жөнүндөгү мыйзамга ылайык, биз 300 миң адамдын колун топтошубуз керек. Бул кыйынга турат деп ойлобойбуз, анткени аталган маселе ар бир кыргыз жаранынын оюнда турат.

Референдумга жеткирбей, биз депутаттардан суранат элек, биринчиден, аларга делген үйлөр сатылып, ал акча казынага түшсүн. Башка облустан келгендердин чынында эле үйү жок болсо, ошолорго гана ижарага батир алып беришсин. Экинчиден, чет жакка барган саякаттары жөнүндө коомго ачык болгондой кылып отчёт беришсин. Үчүнчүдөн, курортторго барып эс алууну өз чөнтөктөрүнөн чыгарышсын. Эл кыйналып жашап жатса, алар эмнеге биздин эсебибизден чардаш керек?”- дейт Тынаев.