Супер-Инфо
super.kg видео
"Бүбүмариям Муса кызы 10 томдук "Айкөл Манас" китебин порнографияны аралаштырып жазган" дешет активисттер
“Бүбүмариям Муса кызы "Манасты" бурмалоодо”,- деп билдирди “7-апрель күчтөрү” коомдук бирикмесинин мүчөсү Чынара Жамгырчиева. Бул тууралуу 4-мартта Бишкекте өткөргөн маалымат жыйынында айтып чыкты. Анын айтымында, Бүбүмариям Муса кызы белгисиз бирөөлөрдүн каражаты менен “Айкөл Манас” деген 10 томдук китеп чыгарып, кыргыз мамлекетине акысыз таратып жиберген. “Бул китеп менен "Манастын" буга чейинки варианттарын жокко чыгарып, "40 чоронун бири Жайсаңдын арбагы менен түшүмдө сүйлөшүп жазганмын" деп коомчулукка таркатып жиберген. Бул китепти окуу куралы катары колдонууга экс-министр Канат Садыков тарабынан кол коюлган экен. Азыр китеп Кыргыз-Орус Славян университетинде колдонулуп жатат. Китеп 2011-жылы чыкканда экс-президент Роза Отунбаева каршы болуп, китеп басмаканадан артка кайтарылган, кийин аталышын өзгөртүп басмаканадан чыгарып жиберишкен. Ошондой эле китепке порнографияны аралаштырып жазган. Азыр мен аны айтып берүүдөн уялам. Андан сырткары Бүбүмариям Муса кызы түшүндө Жайсаң менен орусча сүйлөшүп жазыптыр”,- деди Жамгырчиева.
0
Бул абдан ызы-чуулуу маселе болчу, бул боюнча чоң илимий конференция болуп, кыргыздын акын-жазуучулары, манас таануучулары, академик, профессорлор, илим адамдары катышкан, чооң талкуу болгон.Ал бир канча күнгө созулуп, конференциянын материалдары кыскартылбай, оңдолбой гезитке жарыяланып турган (кайсы гезит экенин унутуп жатам).Жыйынтыгында президентке кайрылуу жолдонгон (жаңылбасам, 100дөн ашык адам кол койгон).
1.
Кайыптан алынып жазылды делинген "Айкөл Манас" эмгегине таптакыр тыюу салынсын!
"Манас" эпосун сактоо жана кеңири жайылтуу" Республикалык коомдук кыймылынын демилгеси жана уюштуруусу менен өткөрүлгөн "Улуу сөздүн кечээги жана бүгүнкү тагдыры" аттуу илимий-практикалык конференция "Манас" эпосу дүйнөлүк рухий-көркөм байлыктардын алтын казынасына кирген кайталангыс залкар чыгарма экендигин белгилейт.
Эл-жердин эркиндигин, ынтымагын, достукту, адеп-ахлактык, рухий-көркөм, философиялык асылдыктарды даңазалап, элибиздин көп кылымдык күрөшүн, тарыхын, дүйнө таанымын бөтөнчө көркөм-эстетикалык бийиктикте баяндаган бул чыгарма эл тарабынан жаратылып, өнүктүрүлүп келген жана аны элдин өзүнөн башка эч ким энчилеп алганга, маани-маңызын бурмалоого акысы жок.Кийинки жылдары "Манас" эпосун жана анын борбордук каармандарын сөз кылып, аларда жок нерселерди ойлоп таап, ой-тоодон, асман-арбактан алынган ой-жорууларды ага чаптаган парапсихолог, гипнолог, торолог, экстрасенс, көзү ачык сыяктуу көп сандаган адистер пайда болду.
Алардын айрымдары өзүлөрүн манас таануучу, манас изилдөөчү деп атап алышып, салттуу эпостун маани-маңызын, рухун бурмалаган, тикелей бузган көз караштарды элге сиңирүүгө жан талашып аракеттенип жатышат. Мындай чыгармалардын ири алдында Жайсаң Үмөт уулунун арбагынан алып, Бүбүмариям Муса кызы жазды делинген "Айкөл Манас" аттуу чуулгандуу чыгарма турат. Бул он томдуктун авторлору "Кылым көчү" аттуу коомдук бирикменин мүчөлөрү болуп эсептелери шексиз.
Алар өз жактоочулары жана сүрөөнчүлөрү менен бирдикте салттуу эпостун сюжетин, идеясын жана образдар системасын ченемсиз бурмалап бузган, элге жат идеяларга толтурулган дастан сымал бул чыгармасын "чыныгы эпос - ушул", "кыргыздын чыныгы тарыхы ушул" деген зордукчул көз карашын элге таңуулап отурушат. Чын-чынына келгенде бул чыгарма элдик эпостун рухун биротоло бузуп, маани-маңызы чалкеш бирдемеге айлантып, ал аркылуу аны жараткан элди мазактоо максаты менен жазылгандыгы шек туудурбайт.
Эпостун салттуу тазалыгын сактоо - азыркы учурдун эң орчундуу милдеттеринин бири. Ошондуктан жүздөгөн жылдардан бери калыптанып, элибиздин жан дүйнөсүнө сиңген эпостун асыл идеяларын, образдарын жана философиясын С.Орозбаков, С.Каралаев, Тоголок Молдо, М.Чокморов, Ш.Азизов (ж.б.) сындуу залкар манасчылардын варианттары боюнча элге кеңири жайылтуу, пропагандалоо жана келечек муундарга окутуу маселелери туура жолго коюлушу керек.
Бул маанилүү иште Кыргыз Республикасынын Жогорку Кеңеши тарабынан 2011-жылдын 9-июнунда кабыл алынган "Манас" эпосу жөнүндө мыйзамы укуктук негиз катары жетекчиликке алынышы милдет. Бул мыйзамга ылайык "Манас" эпосун ар кандай бурмалоолордон, улуу мурастын атына жамынып терс идеяларды элге сиңирүү аракеттеринен арылтуу, мындай иштерге чечкиндүү бөгөт коюу зарыл.Эпосту билим берүү мекемелеринде окутуу маселеси да ушул мыйзамга, КРнын Билим берүү жана илим министрлиги тарабынан бекитилген типтүү окуу программаларына ылайык белгилүү бир ырааттуулукта жүргүзүлүшү зарыл.
"Манас" эпосун сактоо иш жүзүндө кыргыз элинин руханий саламаттыгын сактоо дегенди түшүндүрөт. Аталган иш-аракеттердин өтө маанилүү жана кечиктирилгис мүнөздө экендигин белгилеп, "Улуу сөздүн кечээги жана бүгүнкү тагдыры" аттуу республикалык илимий-практикалык конференциянын
резолюциясы кабыл алынган (ал төмөндө).
2013-жылды "Манас" жылы деп жарыялоо өтүнүчү Кыргыз Республикасынын Президентине жана Жогорку Кеңешке жиберилсин.
Кыргыз элинин рухий саламаттыгынын баштапкы жана эң орчундуу булагы болуп эсептелген "Манас" эпосун бурмалоолорго жана анын атынан башка бир чыгармаларды сунуш кылууга жол берилбесин. Мындай аракеттер улуттун рухий коопсуздугуна шек келтирген кадам катары баалансын."Манас", "Семетей", "Сейтек" үчилтигинин С.Орозбаков, С.Каралаев, Тоголок Молдо, М.Чокморов, Ш.Азизов (ж.б.) салттуу варианттарын калың элге жеткидей нускада бастырып чыгаруу иши колго алынып, аны каржылоо ишине көмөк көрсөтүү Кыргыз Республикасынын Өкмөтүнөн суралсын.
Манас таануу сабагы орто мектептерде, атайын орто жана жогорку окуу жайларында С.Орозбаков жана С.Каралаев сыяктуу залкар манасчылардын классикалык варианттары боюнча гана окутулсун.
"Манас" эпосунун классикалык үлгүлүү варианттарын башка тилдерге которууда бурмалоолорго жана кошумчаларга жол берилбесин.
"Манас" эпосунун классикалык үлгүлүү варианттарын ар тараптуу жана терең изилдөө иштерин күчөтүү максатында КР УИАнын Ч.Айтматов атындагы Тил жана адабият институтунун алдында "Манас таануу борборун" кайра ачып, зарыл каражат жана кадрлар менен камсыздоо жагы КР Өкмөтүнөн суралсын.
Кыргыз-Орус Славян университетинде автордук коллектив тарабынан жазылган "Манасоведение" аттуу окуу куралын колдонуудан алып салуу жагы КРнын Билим берүү жана илим министрлигинен суралсын.
Массалык маалымат каражаттарында жана коомдук телерадиоканалдарда Манастын ысымын туш келди пайдаланып, иш жүзүндө эпостун аброюн тебелеп- тепсеген материалдарды текшерүү, чындыгын далилдөө иштерин жүргүзүү мамлекеттик тиешелүү органдардан суралсын.
Манас таануу сабагын Бүбүмариям Муса кызынын кайыптан алып жазылды делинген "Айкөл Манас" ("Жайсаң") аттуу маани-маңызы бузук, салттуу эпосту өлчөөсүз бурмалаган чыгармасы боюнча өтүүгө таптакыр тыюу салынсын.
Бүбүмариям Муса кызынын кайыптан алып жазылды делинген "Айкөл Манас" китебин орто мектептердин, атайын орто жана жогорку окуу жайларынын китепканаларында ачык колдонуудан алып салуу жагы КР Билим берүү жана илим министрлигинен суралсын.
Бүбүмариям Муса кызынын кайыптан алып жазылды делинген "Айкөл Манас" китебин мамлекеттик телерадиоканалдарда, гезит-журналдарда пропагандалоо ишине тыюу салынып, көзөмөл жүргүзүү жагы тиешелүү бийлик органдарынан суралсын.
Бүбүмариям Муса кызынын кайыптан алып жазылды делинген "Айкөл Манас" китеби "чыныгы "Манас" эпосу же анын варианты, "анда айтылгандар чыныгы кыргыз тарыхы" деп "Манас" эпосу жөнүндөгү" мыйзамга карама-каршы келген көз караштарды жайылткандар жоопко тартылсын.
Ушул бузук чыгарманы жаратып, жайылтууга активдүү катышкан "Кылым көчү" аттуу коомдук бирикменин ишмердүүлүгүн текшерүү иши КРнын тиешелүү мамлекеттик органдарынан суралсын.
Ушул он томдукту элге сиңирүүгө чоң салым кошуп, идеологиялык жактан камсыздап келген Саентология борборунун ишмердүүлүгүн текшерүү иши Кыргыз Республикасынын тиешелүү бийлик органдарынан суралсын. (Мындай борбор Казак Республикасында жана бир катар чет өлкөлөрдө зыяндуу уюм катары жабылган).
"Айкөл Манас" китебин бир нече жолу көп нуска менен басып чыгарып, басымдуу бөлүгүн бекер тараткан "Бийиктик" басмаканасынын ишмердүүлүгүн текшерүү тиешелүү органдардан суралсын.
"Кылым көчү" бирикмесинин активдүү мүчөсү кинорежиссёр Э.Абдыжапаровдун саентологиячыл, мунчул көз карашын тиешелүү органдар далилдесе, ошондой эле анын КТРКнын берүүлөрүнө катышы бар экендиги текшерилип, жайсаңчылардын иш-аракеттерин жайылтууга тиешеси бар экендиги аныкталса, КТРКнын Байкоочу кеңешинин мүчөлүгүнөн чыгаруу маселеси Жогорку Кеңештен суралсын.
"Айкөл Манас" он томдугун тынымсыз элге сиңирүүгө аракет кылган "Манас жаңырыгы" телерадиокомпаниясынын ишмердүүлүгүнө "Элдин рухий саламаттыгы сакталуудабы?" деген көз караштан укуктук баа берилсин.
"Манас" эпосу боюнча олуттуу маселелерди талкуулоо максатында 2012-жылдын октябрь-ноябрь айларында жалпы республикалык симпозиум өткөрүлсүн.
Жогорку билим жөнүндөгү мамлекеттик стандартка "Манас таануу" адистигин мамлекеттик компонент катары киргизүү КРнын Билим берүү жана илим министрлигинен суралсын.
Жакиев Бексултан
Кыдырбаева Раиса
Садыков Абдыкадыр
Даутов Кадыркул
Өмүрканов Анатай
Дүйшеев Шайлообек
Абакиров Курманбек
Абакиров Мелис
Сооронов Омор
Тургуналиев Топчубек
Биялиев Абак
Жайнакова Айнек
Нурушев Эсенбай
Мусаев Сыртбай
Байжигитов Калыбек
Алахан Садык
Чоротегин Тынчтыкбек
Мукасов Мурат
Медетов Аскар
Турдубаева Назгүл
Исаева Сайрабүбү (238 адам кол койгон)
Бул китептин авторун,аны чыгарууга көмөктөшкөн адамдарды сектанын мүчөлөрү,ошолор каржылайт, ошон үчүн кыргызга, Манаска тиешеси жок нерселер аталган китепте камтылып калган деп айтылат.
Мисалы, 10 томдук чыгыптыр, ар бир томдугу эле 1000 нускадан кем эмес болсо, 10 томдукту эсептеп көргүлө, канча болот,аны басууга эле канча каражат керек...
Ал эми бүгүнкү маалымат жыйынын бергендер бул боюнча кабары жок окшойт деп калдым,балким, ушуларды окуп маалымат алышар.Же Бүбүмариям ишмердүүлүгүн дагы эле улантып жатканбы...