Лейлекте 3 жыл мурун жашы жете элек кызды зордуктаган милиция кызматкери жазасыз жүргөнү айтылды

Бүгүн, 5-марттагы маалымат жыйынында Кризистик борбордун жетекчиси Бүбүсара Рыскулова "Лейлек районунда 3 жыл мурун жашы жете элек кызды зордуктап койгон милиция кызматкери жазасыз калды" деп билдирди.

"Зордукталган кыздын боюна бүтүп калып, 2013-жылы август айында ал эркек бала төрөгөн. Учурда кыздын абалы жакшы эмес. Анын психикалык жана моралдык абалы да канааттандырарлык эмес. Соттун акыйкатсыздыгынан аны кордогондор тиешелүү жаза алышкан жок. Кызды алгачкы жолу милиция кызматкерлери Т.Жалилов жана М.Муратов аба майданы тарапка унаа менен алып барып, Т.Жалилов зордуктаган экен. Кийин Т.Жалилов кызды коркутуу жолу менен дагы 2 жолу зордуктаган. Үчүнчү жыныстык катнаштан кийин ал кыздын боюна бүтүп калган. Бул тууралуу кыздын жакындары билген эмес, кийин курсактагы бала кыймылдай баштаганда кеч болуп калган. Эгер бул кыз кош бойлуу болуп калбаганда, окуя ачыкка чыкпай калмак",- дейт Б.Рыскулова.

Анын айтымында, милиция кызматкерлери башка бирөөнү коркутуп бул кылмышты моюнуна алдырууга аракет кылышкан. Бирок кийин туугандыкты аныктоочу анализден кызды зордуктаган милиция кызматкери баланын атасы экендиги аныкталган. Бардык далилдер турганы менен, ал милиция кызматкери жазасыз калды. 

"Кадамжай райондук соту 2014-жылдын 9-октябрында кыздын зордукталгандыгын далилдөөчү материалдар жетишсиз деп тапкан. Сот милиция кызматкерлерин "кызматтык абалынан пайдаланган" деп, кылмышка шектүүлөрдүн бирин 2 жылга, ал эми экинчисин 1 жылга эркинен ажыраткан. Апелляциялык арыз жазылган соң, соттук териштирүү кайрадан Баткен облустук сотуна жөнөтүлгөн. Кийин бул ишти Жогорку Сот карап чыгып, Ош облустук сотуна жөнөткөн. Бул окуядан бери 3 жыл убакыт өтсө да, эч кандай акыйкаттык орун алган жок. Ал эми жабырлануучунун абалы көңүл кубантарлык эмес”,- деди Б.Рыскулова.