Жабырлануучу: “Күйөөмдү сүзүп кеткен унаанын айдоочусу "7-каналдын" жетекчиси болушу мүмкүн”

“Күйөөмдүн өлгөнүнө 52 күн болду, бирок күнөөлүүлөр жоопко тартылбай, иш жабылып калды”,- деп билдирди Насиба Хожибекова бүгүн, 10-мартта болгон маалымат жыйыны учурунда. Анын айтымында, 18-январь күнү Бишкек-Ош унаа жолунда анын 1983-жылы туулган күйөөсү Жылдызбек Сарпашевди унаа сүзүп кетип, ал ошол жерден каза тапкан.

“Күйөөм каза болгондон кийин аны сүзүп кеткен айдоочу келип биздин ал-абалды сураган жок. Жолдошум экөөбүздүн ортобузда бир балабыз бар, өзүбүз батирде турабыз. Балким, бизге материалдык, моралдык жактан жардам беришсе, биз сүйлөшүп алмакпыз. Жакында Бишкекке келип, иш жабылып калганын билдик. Укканыбызга караганда, айдоочу "7-каналдын" жетекчиси болушу мүмкүн. Тергөө иштери да жакшы жүргүзүлгөн жок. Биздин үй-бүлөгө жардам берип коюңуздар, иш кайрадан тергелсин”,- дейт маркумдун аялы.