Эртең Ысык-Көлдө жаш балдарга карата зомбулук, диний кырдаал талкууланат

Ысык-Көлдө эртең, 11-мартта Кыргыз Республикасындагы Мусулмандар дин башкармалыгынын муфтийи Токтомушев Максатбек ажынын катышуусунда жыйын өтөт. Бул тууралуу өкмөттүн Ысык-Көл облусундагы ыйгарым укуктуу өкүлүнүн басма сөз кызматынан билдиришти.

Белгилүү болгондой, жыйында улуттар аралык ынтымак, биримдик, өлкөдөгү диний кырдаалдар, Сирияга кетип жаткан тургундар, радикалдуу ислам агымдары, аялдар жана жаш балдарга болгон зордук-зомбулук жана башка динге тиешелүү маселелер талкууланат.  

"Ысык-Көл облусу боюнча өспүрүмдөрдүн диний-­экстремисттик уюмдарга тартылуусу аныкталган жок. Азыркы учурда мектепке барбай калган балдарды окууга алып келүү боюнча иштер күчөтүлүүдө. Диний уюмдардын өкүлдөрү менен биргеликте өспүрүмдөр жана ата-энелер менен жолугушуу, сүйлөшүүлөр өткөрүлгөн" деп айтылат маалыматта.