Ошто жашы жете элек кыздын таякелери тарабынан зордукталышы боюнча кылмыш иши сотко өткөрүлгөн

Ош облусуна караштуу Өзгөн районунда жашы жете элек кыздын таякелери тарабынан зордукталышы боюнча кылмыш ишинин тергөө амалдары аяктап, иш соттук кароого өткөрүлгөн. Бул тууралуу бүгүн, 12-мартта SUPER.KG порталына Ош облустук ички иштер башкармалыгынын басма сөз катчысы Жеңиш Ашырбаев билдирди. 

"Өзгөн районунда 65 жаштагы жаран 36 жана 22 жаштагы балдары менен жашы жете элек кызды эки жыл бою зордуктап жүргөн факты боюнча кылмыш ишинин тергөө амалдары толугу менен аяктаган. 6-январь күнү ал Өзгөн райондук сотуна жөнөтүлгөн. Учурда бул иш соттук кароодо, азырынча жыйынтыктары чыга элек",- деди Ж.Ашырбаев. 

Айта кетсек, 2014-жылдын 8-декабрында Өзгөн райондук милициясына арыз менен 47 жаштагы Т.К. аттуу айым кайрылган. Анда ал анын кызын 10 жашынан баштап таякеси эки баласы менен зордуктап келгендигин айткан. Жүргүзүлгөн иликтөө иштеринин алкагында соттук-медициналык экспертиза кыздын зордукталгандыгын аныктаган. Бул факты боюнча КРнын Кылмыш-жаза кодексинин 129-беренесинин 4-бөлүмү, 111-беренесинин 2-бөлүмү жана 161-беренеси боюнча кылмыш иштери козголуп, 65, 36 жана 22 жаштагы жарандар кармалган.