Ички иштер министрлигинин кызматкерлери Тажикстандагы кесиптештери менен экстремизм жана терроризм маселелерин талкуулашты

Кечээ, 12-март күнү ИИМдин 10-Башкы башкармалыгынын кызматкерлери Тажикстандын Уюшкан кылмыштуулукка каршы башкармалыгынын орган адамдары менен жолугушуп, эки тараптуу кызматташууну бекемдөө жана диний экстремизм жана терроризмдин алдын алуу боюнча иш-аракеттерди талкуулашты. Бул тууралуу ИИМдин басма сөз кызматы бүгүн, 13-мартта билдирди. Маалыматка караганда, эки өлкөнүн милиция кызматкерлери өз ара тажрыйба алмашуу менен катар замандын актуалдуу деген көйгөйлөрүнө туруштук берүү боюнча методдорду иштеп чыгышты.

Ошондой эле КРнын ИИМинин 10-Башкы башкармалыгынын кызматкерлери кыргыз мамлекетинин Тажикстандагы атайын ыйгарым өкүлү Мирослав Ниязов менен жолугушуп, Жакынкы Чыгыштагы диний кырдаалдарды талкуулашты. 

Жумушчу сапар Тажик Республикасында окуган кыргыз студенттери менен жолугушуу менен уланды. Студенттерге радикалдык исламчыларга берилип кетпөө боюнча лекциялар окулду.