Асылбек Жээнбековдун басма сөз катчысы журналисттерди спикер тууралуу жалган маалымат таратпоого чакырды

Айрым массалык маалымат каражаттарындагы "Жогорку Кеңештин төрагасы Асылбек Жээнбековдун туугандары Кара-Кулжа районунда жооптуу кызматтарды ээлеп алышты" деген маалыматка бүгүн, 16-мартта спикердин басма сөз катчысы Нурканбек Керимбаев жооп кайтарды. Керимбаев мындай маалыматтар төраганы каралоо үчүн атайын жасалган аракет деп эсептейт.

"Спикердин жакын тууганы Султанбек Байымбетов Кара-Кулжа районунун акими" деген маалымат жалган. Султанбек Байымбетов төраганын жакын тууганы эмес жана бүгүнкү күндө Кара-Кулжа районунун акими эмес. Азыркы учурда райондун акими - Каныбек Алиязов.

Экинчиден, Кара-Кулжа айыл өкмөтүнүн жетекчиси делген Кадыр Токтомушев спикердин жакын тууганы эмес жана ал айыл өкмөттү жетектебейт. Ушундай эле жалган маалыматтар Жумабай Шөкөев жана Урмат Асанбековдорун ысымына байланыштуу таратылган. Кара-Кулжа райондук билим берүү мекемесинин башкы эсепчиси Майрам Жээнбекова да спикердин бир тууганы эмес. Төраганын бир тууган иниси Жыргал Жээнбеков Кара-Кулжа районунун токой чарбасынын башчылыгынан кеткенине үч жылдан ашты",- дейт басма сөз катчы.

Асан Боронбаев аттуу адамдын Кара-Кулжа райондук коругунда эмгектенгенине 40 жылдан ашканы, жетекчилик кызматка А.Жээнбеков төрага болгондон 20 жыл мурун келгени кошумчаланды.

"Жалган маалымат тараткандар мыйзамдан коркпосо да, Кудайдан корксо туура болмок",- дейт Керимбаев.