2 жаштагы баланын окуясы боюнча кармалган туугандарына "адам өлтүрүүгө аракет кылган" деген айып тагылды

Чүй облусунда 2 жаштагы баланын катуу сабалып, зордукталганы боюнча козголгон кылмыш ишинин материалдары Аламүдүн райондук сотуна өткөрүлдү. Бул тууралуу бүгүн, 18-мартта SUPER.KG порталына Чүй облустук ички иштер башкы башкармалыгынын басма сөз кызматынын ага тескөөчүсү Нургүл Нусупова билдирди. 

"Бул окуя боюнча тергөө амалдары Чүй облустук ички иштер башкы башкармалыгынын Иликтөө башкармалыгына өткөрүлүп берилген. Кылмышка шектүү катары кармалган эки жаранга карата КРнын Кылмыш-жаза кодексинин “сексуалдык мүнөздөгү зомбулук аракеттер”, “адамды өлтүрүүгө аракет кылган” жана “кылмыш далалаты” беренелери боюнча айып тагылып, 16-март күнү козголгон кылмыш ишинин материалдары Аламүдүн райондук сотуна өткөрүлдү",- деди Н.Нусупова. 

Айта кетсек, 11-январга караган түнү шаардагы балдар ооруканасына 2 жашар бала оор абалда жеткирилген. Анын денесинде көптөгөн жаракаттар болгон. Соттук-медициналык экспертиза анын зордукталганын аныктаган. Күч органдары тарабынан бул кылмышка шектүү катары баланын атасынын 47 жаштагы бир тууган агасы жана анын аялы эки айга камакка алынган. Кийин баланын атасы да камакка алынып, ага карата кылмыш иши козголгон.