Ошто шаардык олимпиадада жеңген окуучулар жана алардын мугалимдери сыйланышты

Бүгүн, 23-мартта шаардагы Горький атындагы мектепте окуучулардын предметтик олимпиадасынын шаардык баскычында 1-орунду алган 34 окуучуга жана алардын мугалимдерине Ош шаардык билим берүү башкармалыгынын дипломдору жана баалуу белектери тапшырылды.

Салтанаттуу кечеде аталган башкармалыктын башчысы Куштарбек Кимсанов: “Биз балдардын билимин белек берип ченебейбиз, баланын билими белек менен бааланбайт. Бул жөн гана окуучуну шыктандыруу. Окуучуларыбыз Ош шаарынын намысын өздөрүнүн алып жаткан чыныгы билими менен коргоп келүү милдети менен республикалык олимпиадага катышуу алдында турушат. Талыкпас эмгек, ийгилик каалайбыз”,- деди. Иш-чаранын жүрүшүндө жеңүүчү окуучулардын ата-энелери олимпиада боюнча өздөрүн кызыктырган суроолоруна жооп ала алышты.  

Аталган иш-чарага Ош шаардык билим берүү башкармалыгынын кызматкерлери, мектеп мугалимдери, окуучулар жана ата-энелер катышты.

Мектеп окуучуларынын предметтик олимпиадасы Ош шаарында 4 баскыч менен өтүп, анда 1-орунду багындырган 34 окуучу 26-мартта Бишкек шаарында өтүүчү республикалык олимпиадага катышуу үчүн жөнөп кетет.