Кыргыз жеринен президент Аскар Акаевдин куулганына 10 жыл толду

24-март - Кыргыз Республикасында президент Аскар Акаевдин бийлиги кулатылган күн. Авторитардык режимге каршы көтөрүлүп чыккан эл 2005-жылдын 24-мартында февраль айында өткөн парламенттик шайлоонун жыйынтыгын бурмалап, одоно мыйзам бузууга барган бийликти кулаткан. Элдин нааразычылыгын 2005-жылкы парламенттик шайлоо чегине жеткиргени белгилүү. 

Борбордук "Ала-Тоо" аянтына чогулган карапайым калк жерлердин жең ичинен сатылышы, туура эмес кадрдык саясат, мамлекеттик башкарууга президенттин үй-бүлө мүчөлөрүнүн аралашуусуна каршылык билдиришип, Акаевдин отставкасын талап кылган. 2002-жылкы Аксы окуясы, ага күнөөлүүлөрдүн жазаланбаганы да президентке болгон элдин ишенимин жоготуп, бийликке кыжырланууну күчөткөн. 2002-жылы Үзөңгү-Кууштун Кытайга сатылып кетишине, депутат Азимбек Бекназаровдун камалышына каршы чыккан аксылыктарга акаевдик бийлик ок чыгарып, андан 6 адам каза тапканы маалым. Толкундоо күч алып, абал чыңалганда ошол кездеги мамлекет башчы Аскар Акаев өлкөнү таштай качып, мамлекет жетекчилигине оппозиция өкүлдөрү келишкен. Курманбек Бакиев президент болуп шайланган. 

Эскерте кетсек, 2008-жылдан кийин 24-март календарда кызыл менен белгиленип, "Элдик революция күнү" деп майрамдалып келген. 2011-жылы Жогорку Кеңештин депутаттарынын сунушу менен бул күн "Элдик революция күнү" деген статусун жоготкон. Парламент атайын чечим кабыл алып, андан бери бул күн календарда кызыл эмес.