Кыргыз жигити 6 жылда 100 миң чакырымга чукул аралыкты жөө басып өтүп, "Гиннесстин рекорддор китебине" кирүүнү көздөөдө

Кыргыз жигити Азамат Жаналиев жөө басуу боюнча дүйнөнүн жаңы рекордун коюп, "Гиннесстин рекорддор китебине" кирүүнү көздөөдө. Ал 6 жылда дүйнөнүн 112 өлкөсүн кесип өтүп (болжол менен 112 өлкө), 100 миңге чукул чакырым аралыкты багынтуу аракетин көрөт. Азамат Жаналиев бул тууралуу SUPER.KG порталына кабарлады.

Анын айтымында, буга чейин жөө басуу боюнча 76 миң чакырым аралыкты багынтуу менен канадалык Жан Беливо рекорд койгон. Азаматтын башкы максаты - ушул көрсөткүчтөн ашып түшүп, 86 миң чакырымды басып өтүү. “Кыргыздар кандай гана таланттарга бай! Атактуу акындары, жазуучулары, спортчулары бар. “Азамат маршруту. Кыргыз изи” деген долбоор алкагында кыргыздын желегин бир катар өлкөлөрдө орнотуп, кыргыздарга таандык дагы бир из калтырууну каалайм. Азыр бул идеяны колдогон команда түзүү менен алекмин. Бул сапарга аттанганга чейин жөө жүрүш боюнча өлкө биринчилигин да уюштурууну пландап жатам”,- дейт ал.

Учурда алыс аралыктарга басып машыгуу өткөрүп жаткан Азамат ошол эле учурда узакка сапарга чыгууда эмнелер керектелерин изилдеп жатканын айтты. “Бул идея мага Москвада жүргөндө келген. Буга кенен эле 6-7 жылымды берем. Бул убакыт аралыгында мен өлкөгө кайтып келбейм. Артымда команда түзүп, калтырып койсом, алар мен тууралуу жаңылыктарды элге жеткирүү аракетин көрүп, мага туура маршрутту көрсөтүп берип турушат. Менин планым боюнча, сапарым 2015-жылы башталса, Азияны, Африканы, Американы, Австралияны, анан Европаны кыдырып, Кудай буюрса, 2021-жылы кайтып келем”,- деп кошумчалайт А.Жаналиев.