Муфтий Максатбек Токтомушев "Бүткүл дүйнөлүк Куранга ой толгоо" уюмунун директору менен жолугушту

Кыргыз Республикасынын муфтиятынын башчысы Максатбек ажы Токтомушев Сауд Арабия жергесиндеги "Бүткүл дүйнөлүк Куранга ой толгоо" уюмунун директору Наср ибн Сулейман жана аталган уюмдун башкы адистери менен жолугушту. Бул тууралуу бүгүн, 25-мартта муфтияттын басма сөз кызматы билдирди.

Маалыматка ылайык, иш сапары менен келишкен "Бүткүл дүйнөлүк Куранга ой толгоо" уюмунун өкүлдөрү муфтий Токтомушевге Курандын туура көрсөтмөсүнүн негизинде тажрыйба алмашуу жаатында, ошондой эле эки тараптуу кызматташтыктын өркүндөшүнө өз салымдарын кошорун билдиришти.

Мындан тышкары бүгүн аталган уюмдун өкүлдөрү “Ыйман” руханий маданиятты өнүктүрүү фондунун төрагасы, Кыргыз ислам университетинин эмгек жамааты, Бишкек шаардык мусулмандар казысы жана Жогорку Кеңештин вице-спикери Төрөбай Зулпукаров менен жолугушуп, андан соң борбор калаадагы диний окуу жайлар менен жеринен таанышышмакчы.