Бишкекте Улуу Ата Мекендик согуштагы жеңиштин 70 жылдыгына карата "Эскерүү эстафетасын” өткөрүүгө даярдыктар көрүлүүдө

Бүгүн, 26-мартта борбор калаадагы "Жеңиш" аянтында Улуу Ата Мекендик согуштагы жеңиштин 70 жылдыгына карата "Эскерүү эстафетасы” эл аралык акциясына кызуу даярдыктар көрүлүүдө.  

Учурда аянтта кызыл жана сары түстөгү желектер илинип, таш төшөлгөлөрдү тазалоо жана ортосундагы тешиктерди жамоо иштери аткарылууда. Ал эми шаардык мэрияга караштуу "Жашылдандыруу" муниципалдык ишканасынын кызматкерлери аянттын айланасында арчалардын жаңы көчөттөрүн отургузуу, гүл жана чоң арчалардын түптөрүн жумшартуу иштерин жүргүзүүдө. 

Эртең борбордо өтүүчү акцияга Улуу Ата Мекендик согуштун ардагерлери, Жогорку Кеңештин депутаттары катышмакчы. Ага карата бир катар майрамдык иш-чаралар да өткөрүлөт. 

Айта кетсек, "Эскерүү эстафетасы” эл аралык акциясы 11-март күнү Беларустун борбору Минск шаарында старт алган. Бул акция эми Баку, Кишинёв, Ереван, Дүйшөмбү жана Астана шаарларында да өткөрүлмөкчү. Ал эми 9-Май - Жеңиш күнү аталган эстафета Москвада өтүүчү ири парадда аяктайт.