Ош облусунда жайлоодогу бала бакчалардын фестивалы өткөрүлдү

24-26-мартка чейин Ош облусунун Кара-Кулжа, Алай жана Чоң-Алай райондорунда «Жайлоодо биз жүрөбүз, көп нерсени үйрөнөбүз да, өсөбүз» урааны менен жайлоодогу бала бакчалардын фестивалы өткөрүлдү. Бул тууралуу бүгүн, 26-мартта Билим берүү жана илим министрлигинин басма сөз кызматы билдирди.

Маалыматка караганда, иш-чаранын максаты жайлоодогу бала бакча түшүнүгүн жалпыга жайылтуу, наристелерди улуттук салтка ылайык тарбиялоо жана коомчулукту экологиялык маданиятка тартуу болуп саналат. Фестивалдын жүрүшүндө катышуучуларга чийден, кийизден жана башка материалдардан оюнчук жасоо боюнча мастер-класстар өткөрүлдү.  

Ошондой эле наристелер конокторго музыкалык номерлери менен иш-чараны шаңга бөлөштү. Фестивалдын алкагында 16 бала бакчага боз үйлөр берилип, ар бири 50дөн балдар адабияттарын алышты.