Борбордогу бала бакчанын 2-кабатынан кулап кеткен наристенин окуясына байланыштуу тарбиячыга сөгүш берилди

Борбордогу №113-бала бакчанын 2-кабатынан кулап кеткен наристеге байланыштуу окуя боюнча тарбиячыга сөгүш берилди. Бул тууралуу бүгүн, 27-мартта SUPER.KG порталына Бишкек шаарындагы Билим берүү башкармалыгынын жетекчиси Сауле Мейрманова билдирди.

"Бул окуяга байланыштуу атайын комиссия түзүлгөн. Учурда аталган комиссия териштирүү иштерин жүргүзүүдө. Жагымсыз окуя катталган бала бакчада инструкция, эмгекти коргоо, коопсуздук системи текшерилүүдө. Азыркы тапта бала бакчанын тарбиячысына сөгүш берилди. Ал эми комиссиянын иши аяктаган соң бала бакчанын жетекчисине да чара көрүлмөкчү",- деди С.Мейрманова. 

Айта кетсек, 23-мартта саат 11:45 чамасында №113-"Баластан" бала бакчасынын 2-кабатынын терезесинен кичинекей бала кулап кеткен. Окуянын күбөсү Жыпара Сыдыкова баланы көрүп калып, бала бакчанын кызматкерлерин жардамга чакырган. Ал өз сөзүндө "Тез жардам" чакыргыла десем, бала бакчанын кызматкерлери болбой, мени урушуп, кууп чыгышты" деп билдирген болчу.