Австрия – "сакалчан ырчы айым" Кончита Вурсттун жана атактуу композиторлордун мекени (фото)

Австрия дегенде эсиңизге биринчи эмне келет? Унутпаган чыгарсыз, былтыр “Евровидение-2014” сынагынын финалында дүйнөлүк коомчулуктун көңүлүн буруп, аталган өлкөнүн өкүлү болуп чыккан Кончита Вурсттун жарыштын жеңүүчүсү болуп жарыяланганы чоң талкуу жараткан. "Сакалчан ырчы айым" журналисттерге берген маектеринде мекени Австрия менен чексиз сыймыктанарын көп айтат. Бул жеңиштин арты менен быйылкы жылдын май айына белгиленген “Евровидение” сынагы Австриянын борбору Вена шаарында өтөт. Сөз Кончита Вурсттан бекеринен башталган жок, анткени Венада кезинде Вольфганг Амадей Моцарт, Людвиг ван Бетховен, Франц Шуберт, Иоганнес Брамс, Иоаганн Штраус (атасы менен уулу) жана башка дүйнөдөгү эң атактуу композиторлор жашап өтүшкөн.

Вена – дүйнөдөгү эң байыркы жана эң кооз шаарлардын бири. Калкынын саны 2 миллион кишинин тегерегинде, тагыраагы, Австриянын ар бир төртүнчү адамы Венада жашайт. Тарыхына келсек, көптөгөн кылымдар бою аталган шаарда Габсбургдардын (1282-1918-жылдар аралыгында өкүмдардык кылган Европадагы кудуреттүү монархиялык династия) резиденциясы жайгашып, Европанын маданий жана саясий борбору болуп турган. Бүгүнкү жашоосуна токтолсок, эл аралык “Mercer” агенттигинин жыйынтыгына ылайык, Вена дүйнөдөгү 221 шаардын ичинде жашоо сапаты жана ыңгайлуулугунун деңгээли боюнча беш жолу биринчи орунду ээлеген. Анда инфраструктура, коомдук транспорт, банк, коопсуздук, маданият жана жагымдуу убакыт өткөрүү көрсөткүчтөрү боюнча эң мыкты бааларды алган.

Венанын көрүнүктүү жайлары:

Ыйык Стефан чиркөөсү – Австриянын жана Вена шаарынын улуттук символу. Собор жайгашкан жердеги алгачкы храм 1137-1147-жылдары курулган, азыркы чиркөө 1511-жылы курулуп бүткөн. Толук масштабдуу реставрациясы 1980-жылдары башталган жана бүгүнкү күнгө чейин уланып келет. Чиркөөнүн эң бийик мунарасы 136 метрден турат жана аталган собор дүйнөдөгү эң бийик мунаралуу чиркөөлөрдүн арасында 8-орунда. Анын жер төлөсүндө собордун кызматкерлеринин, монархия өкүлдөрүнүн, шаар калкынын, баш-аягы 10 миңден ашуун адамдын сөөктөрү жерге берилген.

Вена мамлекеттик операсы – Австриянын эң чоң опера театры, музыка маданиятынын борбору. Имараты 1869-жылы курулуп бүткөн жана Моцарттын “Дон Жуан” деген операсы менен ачылган. 1955-жылдан бери жыл сайын Вена операсында вальс бийинин кечеси өтүп келет. Бүгүнкү күндө Вена мамлекеттик операсына кирүү үчүн билеттерди кезек менен айлап эрте алышат.

Хофбург хан сарайы – Габсбургдардын кышкы резиденциясы жана азыркы тапта Австрия президентинин ак сарайы. Анда 2600 зал жана бөлмөлөр жайгашкан.