Амстердам – "эң бактылуу" шаар (фото)

Нидерланды мамлекетинин борбору жана эң чоң шаары Амстердам болуп саналат. Калаанын аталышы “Амстел дарыясындагы дамба” деп которулат. Суу жээгинде жайгашкан шаар мурун балыкчылардын кыштагы катары таанымал болсо, бүгүнкү күндө Европадагы эң белгилүү туристтик борборлордун бири. Калкынын саны 1 миллион кишиге чукул жана 180ге жакын улуттун өкүлү жашайт.

Амстердам каналдардын шаарындай сезилет. Анда "сүзүп жүргөн" же калкып турган үйлөр көп жана шаарда 600дөн ашуун көпүрө бар. Дагы бир өзгөчөлүгүн айта кетүү керек, аталган шаардын тургундары жоогазын өстүрүү менен “оорушат”. XVII кылымда жергиликтүү жашоочулар сейрек кездешүүчү жоогазындын башы үчүн үй-жайын айырбаштап жиберген окуялар өткөн. Азыркы тапта Амстердамдын дүкөндөрүнөн 10-15 жоогазындын башы салынган баштыкчаны 3-4 еврого сатып алса болот.

Амстердам ошондой эле жеңил баңгизаттарын колдонууга уруксат бергендиги менен атагы чыккан. Башкача айтканда, оор баңгизаттарын колдонгон чөйрөдөн жеңил баңгизатын колдонгондорду алыстатуу максатында уруксат берилген. Сыртында “Coffeeshop” (“Кофешоп”) деген жазуусу бар дүкөндөрдө кара куурай сатылат. Баасы 3 евродон башталат. Мындай дүкөндөргө кирүүгө 18 жашка чыга электерге тыюу салынган. Андан тышкары галлюцинация пайда кылуучу козу карындар да сатылат. Ошондон уламбы, Амстердамдын көчөлөрүндө “бактылуу” туристтердин жылмайып жүргөнүн көп көрүүгө болот.

Амстердамдын көрүнүктүү жайлары:

Падышалардын хан сарайы – учурда ханыша Беатрикстин убактылуу резиденциясы жана монархка тиешелүү үч хан сарайдын бири. Имарат 1655-жылы курулган жана Дам аянтында орун алган.

Мадам Тюссо музейи – момдон жасалган фигуралардын музейи. Атактуу адамдардын тулку бою, кебетесинин көчүрмөлөрүн көрүүгө көп туристтер кызыгышат. Музей 200 жыл мурун скульптор Мария Тюссо тарабынан түзүлгөн. Дүйнөнүн 20дай шаарларында филиалдары бар. Амстердамдагы музей 1971-жылы ачылган.