Казакстанда кыргыз жаштары спорттун самбо түрү боюнча акысыз машыгып жатышат

Казакстандын Алматы калаасында кыргыз жаштары спорттун самбо түрү боюнча “Казфарад” аталган машыгуучу зал ачып, ал жакта каалоочу мекендештерибизди акысыз машыктырышууда. Бул тууралуу аталган машыгуу залынын машыктыруучусу Фархад Абдыжапаров бүгүн, 30-мартта билдирди.

“Өзүм Ош облусунун Кара-Суу районунан болом. Казакстанга эл катары соода кылайын деп келгениме 7 жыл болду. Бул жактан соодадан тышкары спорт менен да алектенип, жыйынтыгында 2012-2013-жылдары Казакстандын чемпиону болгом. Анан спортту сүйгөн мекендештерибизге жардам кылалы деп бул машыктыруучу залды ижарага алганыбызга 7 ай болду. Аталышы дос балдарыбыздын ысымдарынан куралган. Учурда 30га чукул кыргыз жигиттери бекер машыгып жатышат. Алар мелдештерге кыргыз өлкөсүнүн атынан катышышат,”- дейт ал сөзүндө.