Бакыт Төрөбаев: "Өзүбүздөгү өндүрүштү өнүктүрүү зарыл"

"Өнүгүү-Прогресс" партиясынын төрагасы Бакыт Төрөбаев Ош шаарына болгон сапарынын алкагында калаадагы "Жим-Мей" кир жуугуч жабдыгын чыгаруучу мекемесинин ишмердүүлүгү менен таанышып жатып "өзүбүздөгү өндүрүштү өнүктүрүү зарыл" деп билдирди.

Айта кетсек, мекеме партиянын “61” деп аталган экономикалык программасынын алкагында ачылып, бүгүнкү күндө 40тан ашуун жергиликтүү тургунду жумуш оруну менен камсыз кылып келет.

Ошондой эле “Өнүгүү-Прогресс” саясий партиясынын төрагасы жана партиянын мүчөлөрү Ош шаарында эл менен жолугушту. Партиянын эл үчүн жасап жаткан иштерин буга чейин массалык маалымат каражаттарынан уккан шаардыктар бул жолу атайын даректүү тасмадан көрүп, маалымат алышты. Ордолуу Ош шаарындагы жолугушууга “Өнүгүү-Прогресс” партиясынын саясий кеңешиндеги Жогорку Кеңештин депутаттары, кыргыз маданиятынын көрүнүктүү ишмерлери, кыргыз сатира өнөрүнүн башында турган Күмөндөр Абылов дагы катышты.

Бул жолугушууда да элди тынчсыздандырган маселелер боюнча суроолор берилди. Айрыкча шаардын коммуналдык кызматы, пенсия, жөлөк пулдун, эмгек акылардын аздыгы, миграция маселелери элдин негизги көйгөйү катары айтылды.

Буга карата “Өнүгүү-Прогресс” партиясы кыргыз өлкөсү боюнча жумушчу орунду түзүү менен айыл чарба тармагын көтөрүү максатында 15 МТС ачканга жетишкен. Эми алдыда 10-11-класстын окуучуларын орто билим менен катар кесиптик билимге ээ кылып чыгаруу максаты коюлуп, аны ишке ашыруу боюнча аракеттер көрүлүп жатканын “Өнүгүү-Прогресс” партиясынын төрагасы Бакыт Төрөбаев билдирди.